Ang Tinagoan

Gula 57

(Kining maong nobela gibase sa matuod nga kaagi ni Dinah).

Nahisagmuyo si Dinah sa iyang nasayran nga magminyo na si Rex ngadto sa laing babaye nga usa ka Sugbuanon. Sakit alang kaniya ang gibuhat ni Rex, labi na kay nagsabot na sila nga magminyo.

Mao diay nga wala na mobalos si Rex sa iyang mga sulat kay may laing babaye na man diay kini nga gikabuangan didto sa Cebu.

Nahinugon si Dinah sa relasyon nila ni Rex, labina nga may nahitabo na kanila sa makadaghan. Dili na niya maihap kun kapila na niya itugyan ang iyang pagka babaye ngadto kang Rex.

Bisan og giuran-uran na niya ang sex apan giisip niyang mas intimate ang sexual relationship nila ni Rex maong nahinugon gyud siya sa ilang escapades together. Pero kadali ra siyang nakadawat sa kamatuoran.

Life must go on bisan wala si Rex!

Usa kahigayon niana, miadto si Dinah sa siyudad. Wala damhang nagkakita sila si Padre Josh sulod sa usa ka department store. Nagkasulti sila sa makadiyot. Nagkumostahay. Kaswal kaayo ang ilang pagtinagdanay.

Namatikdan ni Dinah nga wala na siya’y “kilig” para kang Padre Josh. Iyang nasuta nga wala nay espesyal nga dapit si Padre Josh sa iyang kasingkasing. Giisip na lang niya kini nga usa ka ordinaryong higala o kaila. Natapos na ang iyang pantasya alang sa pari.

Nabalhin si Dinah og assignment. Gikan sa barangay Bakhaw, mibalhin siya ngadto sa barangay Lampakanay, may gilay-on nga katorse kilometros gikan sa kinapusoran sa lungsod sa Dalisay.

Biklang kaayo alang niya kun mopauli siya ngadto sa lungsod matag adlaw. Nangabang siya’g kuwarto sa usa ka balay nga duol ra sa eskuylahan. Nasuod niya ang anak nga ulitawo sa tag-iya sa balay. Si Kobe. Nabatyagan niya nga may espesyal nga luna si Kobe sa iyang dughan. Gaan kaayo ang iyang kabubut-on ngadto niini. -- Sumpayan pa