Sukli sa utang

Gula 157

Midiyong ang mga mata ni Ferdinand nga mitutok nako. Napahunong siya sa paghungit sa pagkaon nga diha sa iyang plato. Mora’g wala siya magdahom nga mohagad ko sa pagkuyog niya niadtong higayona.

“Tingalig nakalitan ka lang sa gipakanaog mong desisyon, Editha?” Gipangutana ko niya uban sa kaligdong sa iyang panagway.

“Bug-os na ang akong hukom, Ferdinand,” nako pa. “Gitimbangtimbang ko kini sa makadaghan sa wala pa ko modesisyon nga makigkita nimo karon.”

Wala motingog si Ferdinand. Mitutok na usab siya nako.

“Wa ka ba diay motuo nako, Ferdinand?” ako na usab ang nangutana.

“Mituo ko nimo,” niya pa. “Pero tingalig magmahay ka sa kapulihay.”

“Dili kana mahitabo kun imo kong unongan. Magmahay lang tingali ko kun imo kong pasagdan.”

“Editha...”

“Sa gikaingon ko na kanimo, dad-a ko bisan asa kay mokuyog ko. Ang importante alang nako nga makalikay ko sa lalaki nga maoy gusto sa akong mga ginikanan nga akong minyoan. Ikaw ang akong gihigugma, Ferdinand.”

“Di sab ko makatugot nga maminyo ka ngadto sa laing lalaki sa pinugos nga paagi.”

“Kun mao kana, andam kang mounong nako?”

“Andam kong panalipdan ang atong gugma.”

Nalipay ko sa akong nabati gikan kang Ferdinand. Milampos gyud ko pagkuha sa iyang simpatiya. Mituo siya sa akong pagpamakak.

Sa hilom, nakonsensiya ko nga gibakakan nako si Ferdinand. Pero wala ko makahunahuna’g laing paagi pagkuha sa simpatiya niya nga dili mabutyag ang matuod nga nahitabo sa akong pagpakig-live in kang Davon.

Mitibawas mi’g pangaon. Pagkahuman, nanggawas na mi sa fastfood outlet nga among gikan-an. Naatol sab nga may bakanteng taxi nga nagdanga-danga sa among paggawas. Gipara kini ni Ferdinand. Nanakay dayon mi paghunong niini sa among tungod.

“Sa Alabang ta, Bay,” giingnan ni Ferdinand ang driver kun sa Binisaya pa kay gitinagalog man niya ang iyang pagpakigsulti ngadto niini.

Igo lang mitando ang driver dayong padagan sa taxi nga gimaneho niini. Dihang nagdagan na ang taxi, misandig ko sa bus-ok nga dughan ni Ferdinand. Samtang nagpauraray ko sa iyang mga bukton, ingon sa gibati ko ang hingpit nga seguridad. -- Sumpayan pa