Ang Tinagoan

Gula 55

(Kining maong nobela gibase sa matuod nga kaagi ni Dinah).

Bag-o na diay ang kura paruko sa Santa Angela Parish. Si Padre Gio gibalhin na sa pagdestino sa parokya sa laing dapit. Wala nay interes si Dinah kun hain mobalhin si Padre Gio. Wala na pod siya’y interes nga mahimamat ang pari nga mipuli kang Padre Gio sa Santa Angela Parish.

Nakaamgo si Dinah nga dili gayod diay kalaoman ang usa ka pari kay mas palabihon man nila ang iyang bokasyon kay sa pagpakigminyo sa babaye nga iyang gikarelasyon. Giangkon niya nga dakong kasaypanan ang iyang pagpamugos nga makabaton sila’g affair si Padre Gio. Apan wala siya magbasol sa nahitabo tali kanila. Alang kaniya, usa kadto ka talagsaong kasinatian nga nahitabo sa iyang kinabuhi.

Usa ka hapon niana, nahiabot si Rex sa balay nga gipuy-an ni Dinah sa barangay Bakhaw nga dako kaayo’g ngisi. Gipahibalo siya sa iyang boyfriend nga gipadad-an na kini’g telegrama sa kompaniya nga giaplayan niini didto sa Cebu.

“Pareporton ko sa labing daling panahon,” matud ni Rex.

“Maayo hinuon kun mao kana,” ni Dinah. “Congrats!”

Tungod sa kalipay nga gibati ni Dinah nga nadawat na si Rex sa kompaniya nga giaplayan niini’g trabaho, iya kining gipremyohan. Nag-sex sila sukad sa hapon hangtod sa lawom nang kagabhion.

Ug sa adlaw sa dayon nang larga ni Rex ngadto sa Cebu aron mo-report na sa kompaniya nga trabahoan niini, romantiko ang pagpanamilitay nila ni Dinah.-- Sumpayan pa