Tabugok nga puti ang ata

Mikaratil og dagan si Digna, sa dihang maoy nasawod sa duha niya ka dunggan gikan sa iyang silingan ning ilang balangay sa Lawis, nga dili halayo sa baybayon nga kuno si Kumpare niya Nisyo, hilabihan kadaghan og kuha nga tabugok.

Maoy iyang naabtan nga nagkinagang tuod og alsa sa dakong bukag nga hapit mahimabaw sa tabugok ang iyang Kumpare nga taudtaod na usab nga nabiyudo nga sama kaniya nga usa na usab ka biyuda.

"Kuyog na lang nako sa balay Mare Digna, kay pilian tika og dagko kaayo nga tabugok," dihay tuno sa kakalma sa sinultihan ni Nisyo.

"Ikaw ang mag-igo Pre Nisyo," mubong tubag ni Digna.

Wa pa gani silang duha mahitangka sa may tugkaran sa gipuy-an ni Kumpare niya Nisyo kalit lang mibundak ang makusog nga ulan.

Ingon sa nagkuray sa katugnaw si Digna nga maayo kaayo nga pagkahumod sa ulan. Gitutokan siya sa iyang Kumpare nga naglingolingo sa iyang kahimtang nga basa kaayo ang sanina.

"Ayaw lang una pagpauli Mare Digna, kay lutoan ko ikaw og espesyal nga tabugok pinaagi sa paggisal sa mantika!" gipugngan una siya sa iyang Kumpare ilabi na nga wa pa motuang ang ulan. Maoy nasingo ni Digna ang kahumot sa lamas nga gisagol sa linuto nga tabugok ni Kumpare niya Nisyo. Naka tulon siya og laway, ilabi na nga nanuhotsuhot sa iyang ilong ang kagana.

Ambot unsang hitaboa ... nga mikalit man og brownout ang sugang dagitabnon sa VECO, ug maoy mipuli ang kangitngit sa kinatibuk-an nga kosina sa iyang Kumpare.

Hilabihan nga nakabahog ni Digna sa ata sa tabugok diin sukad masukad kadto pa niya hitagamtami ang kalami ug kagana.

Nakamatikod si Kumpare niya Nisyo nga pulos ra ata ang gibahog ni Kumare niya Digna sa kan-on. Hapit dili na gani moginhawa.

"Mare Digna ... unsa goy nahitabo kanimo nga pulos na man lang ata sa tabugok ang imong gibahog?" dihay dili tiaw nga kabalaka nga nagpakisayod si Kumpare niya Nisyo.

"Giganahan god ko sa kalami sa templa sa sabaw sa ata,” nagkanguhal ang sinultihan ni Digna.

Ambot unsang pagkaunsaa ... nga diha may gipahikap ni Kumpare niya Nisyo nga gahi pa sa tabugok? Mao na lamang ang nabatyagan ni Digna ... nga imbis itom ang ata sa tabugok mipuli hinuon ang kaputi nga nanggawas sa gipakuptan sa iyang Kumpare. (Kataposan)