Sukli sa utang

Nakalitan ko ug daw maglisod pagtuo sa gidetalye sa balita nga maoy banner story sa Detective News kabahin sa shootout nga nahitabo sa Cavite nga maoy hinungdan sa kamatayon sa lima ka carjackers. Ang nakapakugang nako mao ang gibutyag sa balita nga ang usa sa napatay sa kapolisan atol sa nahitabong shootout mao si Davon!

Sumala sa balita sa Detective News, gika-engkuwentro sa gikatahapang mga carjackers ang hiniusang puwersa sa Traffic Management Group ug sa Cavite Provincial Police Office nga naghimog checkpoint sa Daang Hari Road, Brgy. Molino 4, Bacoor, Cavite.

Giila ni Col. Rodolfo Trinidad, ang hepe sa Cavite Police Crime Laboratory, ang mga suspek nga sila si Bobby Montan, Arnold Cosing, Anecito Endriga, Joaquin Sigue ug Davon Antigua.

Matud pa sa taho nga nagsakay ang mga suspek sa usa ka Mitsubishi Lancer nga kolor puti nga ilang gi-carnap didto sa San Fernando, Pampanga dul-an sa duha ka semana na ang nakalabay. Gidala nila sa Cavite ang maong sakyanan. Dihang wala sila mohunong sa checkpoint nga gihimo sa kapolisan sa Cavite, gigukod sila sa mga awtoridad.

Dihang wala gayod mohunong ang gisakyan sa mga suspek ug miuna hinuon pagpabuto, napugos ang mga awtoridad sa paggamit sa ilang mga armas ug napatay ang mga carjacker. Na-recover sa lugar diin nahitabo ang shootout ang lima ka kalibre .45 gikan sa mga suspek.

Gibutyag sa kapolisan nga nalambigit usab sa serye sa carnapping, carjacking, robbery hold-up ug uban pang mga krimen ang grupo nila ni Davon. Sumala sa impormasyon nga nakuha sa mga awtoridad, ang grupo nila ni Davon nag-operate dili lang sa Metro Manila kun dili lakip na sa Northern Luzon ug Southern Luzon area.

Nakapanglingo ko human nabasa ang balita. Wala ko magdahom nga usa diay ka carjacker si Davon. Dili diay tinuod nga nagtrabaho siya sa usa ka kompaniya nga dealer og luxury cars. Ug kadtong nagpaila nga usa ka Rodolfo Trinidad nga nangita kaniya niadtong miaging pipila ka adlaw, dili diay tinuod nga managhigala sila. Usa diay ka polis si Rodolfo. Mao diay nga ingon sa nakugang ug nabalisa pag-ayo si Davon dihang akong gitug-anan nga nangita kini kaniya.

Imbes maguol, mora hinuon ko’g naibtan og tunok nga napatay si Davon sa kapolisan. Misantop sa akong hunahuna si Ferdinand. Nalipay kong naghunahuna nga gawasnon na ang among relasyon. -- Sumpayan pa