Ang Tinagoan

(Kining maong nobela gibase sa matuod nga kaagi ni Dinah).

Miligdong pag-ayo ang nawong ni Rex samtang nag-atubang sila si Dinah. Daw naghulat ang ulitawo kun unsay sunod niyang isulti.

“Gusto kong makasal na ta, Rex,” ni Dinah pa, “samtang dili pa maila ang akong tiyan.”

“Di pa unta ko gustong magminyo ta kay wa pa koy trabaho,” nagkanayon si Rex. “Pero naa na man kana. Di mahimong pasagdan tikaw sa maong kahimtang busa bangonon ko ang imong dungog.”

“Salamat, Rex. Daghan gyud kaayong salamat.”

“Kanus-a man ko mangatubang sa imong mga ginikanan?”

“Ikaw mag-igo. Aw, sa labing madaling panahon.”

“Pasidan-i una ang imong parents nga makig-atubang ko nila kay magminyo na ta. Aron sab dili sila makalitan.”

“Okey.”

Morag naibtan og tunok si Dinah. Sulbad na ang iyang problema. Wala na siya’y angay kabalak-an.

Andam na si Rex nga mangatubang sa mga ginikanan ni Dinah. Apan usa ka hapon niana, nadakin-as si Dinah sulod sa banyo sa balay nga iyang gipuy-an sa barangay Bakhaw. Maayong pagkadakdak sa iyang sampot.

Gikuyawan si Dinah kay may dugo nga migawas sa iyang bilahan. Maayo gani kay nadali siyag tabang ni Rex. Gililong nila sa ubang mga tawo ang maong hitabo. Apan nakuha gyud ang bata nga gisabak ni Dinah.

Gumikan sa pag-miscarriage ni Dinah, wala na lang sab ihinayon nila ni Rex ang plano nga magpakasal. Maayo gani kay wala pa sila mahinayak. Mangatubang na ra ba unta si Rex sa mga ginikanan ni Dinah.

Nanglabay ang mga adlaw. Dugay-dugay nang walay simba-simba si Dinah. Usa ka adlaw niana, nabalitaan niya nga mibiya na si Padre Gio sa lungsod sa Dalisay!-- Sumpayan pa