Ang Tinagoan

Gula 50

(Kining maong nobela gibase sa matuod nga kaagi ni Dinah).

Si Rex wala makatuman sa gisulti niya kang Dinah nga kapin sa usa ka bulan ra siya didto sa Cebu. Naabtan siya’g kapin sa duha ka bulan didto. Nagsige siya’g pangaplay og trabaho sa lainlaing mga kompaniya, sibo sa kurso nga iyang natapos nga chemical engineering.

Sa pagpauli ni Rex sa barangay Bakhaw, namalihog si Dinah kang Nang Petring pagsungko sa ulitawo. Gusto siyang makigsulti niini. Kinahanglan nga magkasabot na sila bahin sa pagpakasal sa dili pa mobusyad ang iyang tiyan. Si Rex nay iyang last recourse human magdumili si Padre Gio sa pagpakasal kaniya. Kinahanglang makombinser niya si Rex sa pagpangamahan sa bata nga iyang gisabak. Total, nakasawsaw man sab kini kaniya!

Nianang pagkahapon, nahiabot si Rex sa balay nga giabangan sa pagpuyo ni Dinah sa barangay Bakhaw. Iyang gipakita ngadto kang Rex ang labing maayo niyang tinagdan aron paghatag og konsuylo niini.

“Unsay resulta sa imong pagpangaplay?” Gikan ni Dinah.

“Wa pa gihapoy klaro,” ni Rex. “Sa kadaghan sa mga aplikante, morag tsamba na lang kun kitay mapilian. Duna hinuoy kompaniya nga mipasalig nako nga in two weeks time ila kong tawagan. Basin og makatrabaho na gyud ko. Gilaay na ko sa pagsige’g estambay.”

“Gusto sab bitaw ko nga makatrabaho ka na unta. Labina karon nga may problema ta.”

“P-problema? U-unsang problemaha?”

Mabdos ko. Nagpatan-aw na ko‘g doktor. Hapit na mag-three months kining bata sa akong tiyan.”

“Di ba may proteksiyon ka man aron dili momabdos?”

“Duna bitaw. Pero dihay higayon nga nakalimot ko’g butang. Nisipyat lang gyud.”

Wala motingog si Rex. Mitutok kini kang Dinah. -- Sumpayan pa