Sukli sa utang

Misantop sa akong hunahuna nga mipatigbabaw na sab tingali ang kaseloso ug kahigpitan ni Davon maong nakugang siya pagkasayod nga may tawo nga nahiabot sa apartment nga among gipuy-an ug nangita kaniya. Morag dili siya komportable nga gihinabi nako ang maong tawo nga wala siya. Ang kaigihan lang gyod niining tawhana!

"Kinsa ang giingon mong tawo nga mianha sa atong gipuy-an ug nangita nako, Editha?" Miusab siya sa pagpangutana dihang wala ko motubag sa nahauna niyang pangutana.

"Imo man kuno to siyang higala?" maoy akong tubag. "Rodolfo Trinidad kunoy iyang ngalan."

"U-unsa?"

"May higala ka ba nga ginganlan og Rodolfo Trinidad?"

"H-ha? Aw, oo. Suod kaayo mi nianang tawhana. Unsa man diay iyang gisulti nimo bahin nako?"

"Nagplano man kuno mo nga maghimog joint business venture?"

"Mao ra na?"

"Mao ra. Kadiyot ra man ang among panagsulti. Wa na man gani siya mosulod sa balay pagkasayod nga wa ka."

Nahilom si Davon didto sa pikas tumoy sa linya sa telepono.

"Kanus-a man mo mobalik diri sa Manila, Davon?" gipangutana ko siya.

"Wa pay klaro," maoy iyang tubag. "Mag-agad lang ko ni boss."

Unya mipalain siya'g hilisgotan. Iya kong gipahimangnoan.

"Ayaw pagpasulod og tawo diha sa atong gipuy-an, ha, samtang wa pa ko," niya pa. "Labina gyod kun lalaki."

"Dili, uy," dali kong sanong.

"Ug kun mobalik kadto si Rodolfo diha, ayaw tug-ani kun hain ko."

"Nga-ngano man?"

"Di ko gustong magsunod-sunod siya nako. Di pa ko andam alang sa giplano namong joint business venture."

Wala na lang nako sultihi si Davon nga natug-anan na nako si Rodolfo Trinidad nga tua siya sa Baguio. Dili ko gusto nga masuko si Davon kanako gumikan kay nagpatuyang lang ko'g tabi ngadto kang Rodolfo.

Human sa among panagsulti ni Davon, gibutang na nako ang awditibo. Apan gipunit lang usab dayon nako kini'g balik kay nakahunahuna ko kang Ferdinand. Manawag ko niya. (Sumpayan pa)