Ang Tinagoan

(Kining maong nobela gibase sa matuod nga kaagi ni Dinah.)

Naproblema si Dinah sa iyang kahimtang. Nasuta niya nga lig-on ang baroganan ni Padre Gio. Dili gayod kini mobiya sa pagka pari!

"Kun mogawas man ko gikan sa pagka pari," ni Padre Gio pa. "Maoy akong pakaslan ang akong girlfriend kaniadto nga nurse nga wala pa gihapon magminyo hangtod karon."

Nahisagmuyo si Dinah sa gisulti ni Padre Gio.

Giisip ni Dinah nga dakong gumonhap sa iyang kinabuhi ang problema nga iyang nahiagoman. Nagkinahanglan siya'g kasumbongan sa iyang suliran. Busa, midangop siya sa suod niyang higala, si Miriam.

Gisuginlan niya si Miriam sa tanang mga panghitabo. Si Miriam daw naglisod pagtuo sa iyang gisulti. Nakapanglingo ang iyang higala.

"Kinahanglang may mangamahan niining bata nga akong gisabak, Day," nagkanayon si Dinah ngadto kang Miriam. "Madaot ko sa akong trabaho kun mahimo kong inahan apan dili asawa."

"Lisod gyod nang imong kahimtang, uy," ni Miriam pa. "Unsaon nga pari man sad ang imong nakursonadahan. Tan-awa ni ron, o. Di ba nagkaproblema ka na diay di man gyod kaha mangasawa si Padre Gio nimo."

"Unsa man kahay angay kong buhaton ini, no? Ipa-abort ko na ba lang kaha ning bata nga akong gisabak?"

"Uy, ayaw gyod intawon kana buhata, Day. Ayaw na dugangi ang imong sala ngadto sa Dios. Bahala nag ingnon kang daotan nga pagka babaye basta dili ka lang tawgon og kriminal nga pagka inahan."

Nakahinuktok si Dinah sa gisulti ni Miriam. Nakaingon siya nga husto sab ang opinyon sa iyang higala.

Unya, may laing misantop sa hunahuna ni Dinah! Si Rex, ang iyang boyfriend! Nahimuot siya sa hilom samtang naghunahuna kang Rex. Magamit   niya si Rex! (Sumpayan pa)