Santa Claus is coming to town

Mitingkag ang dunggan ni Joy nga milili sa kuwarto sa iyang site anyos nga anak ning gabhiona nga nagsingabot na gayud ang Pasko. May gikasulti si Geo sa sulod. Mainampingon nga naminaw si Joy.

“Santa Claus, salamat nga nagpakita na gyud ka nako! Karon pa gyud ko makakita nimo sa personal! Kada Pasko gud, bitayon man lang nimo ang akong pinaskohan sa pultahan ning akong kuwarto. Dayon, molakaw ka, kay matud pa ni Mama, bisi kuno kaayo ka matag Pasko...!”

“Oo, Dong Geo! Apan sugod ning paskoha, personal na gyud ko nimong makita ug maoy mangunay sa paghatag sa akong pinaskohan nganha kanimo! Pirme na gyud tang magkita...!”

“Ay, salamat gyud kaayo Santa Claus, ning nindot nga bag-ong sapatos ug pinutos nga mga sinena! Matud sab ni Mama, ikaw man kunoy mihulip sa akong Papa Lito sa paghatag nako’g pinaskohan matag singabot sa Pasko, kay atua pa man si Papa sa abroad...!”

Mihinay sa paglili si Joy sa sulod sa kuwarto ni Geo. Nanlurat ang iyang kalimutaw sa nakita. Si Santa Claus gayud diay ang anaa sa sulod nga gikasulti sa iyang anak ug nagsul-ob pa kini sa iyang orihinal nga uniporme.

Duha na ka tuig nga mibiya nilang Joy ug Geo ang iyang banang si Lito nga usa ka kugihang real-estate broker. Nabuang sa pagpakig-relasyon ang iyang bana sa seksing GRO ug nagkuyogay kining milangyaw sa Mindanao. Sanglit usa ka eligible nga maestra sa publikong eskuylahan, wa maglisod si Joy sa pag-alima kang Geo. Apan gilimdan niya ang iyang anak ug gipatuo nga ang iyang amahan, atua manarbaho sa gawas sa nasud. Ug sa matag Pasko, gipasabot niya si Geo nga si Santa Claus moduaw gyud sa ilang panimalay aron sa paghatag kaniya og pinaskohan, samtang dili pa mahiuli ang iyang Papa Lito gikan sa abroad.

Apan sa hilom, si Joy lang usab ang moputos sa iyang pinaskohan ngadto sa iyang anak ug bitayon niya sa ibabaw sa pultahan sa kuwarto niini. Gipatuo gyud niya nga si Santa Claus ang nagbitay niining maong pinaskohan aron malipay si Geo.

Ug mikalit sa pagsulod si Joy sa kuwarto ni Geo.

“Ma, ania na gayud si Santa Claus! Nagpakita na siya kanato!” nagkatawa si Geo nga nagpaibog sa inahan sa bag-o niyang paresan sa sapatos ug sa laing putos sa sinena. Nagdaling migawas si Geo sa kuwarto ug mipaingon sa ilang hawanan aron isukod ang nadawat nga pinaskohan, gikan kang Santa Claus.

Nahasiga na usab ang mga mata ni Joy dihang naghukas na sa uniporme ang nagtakuban nga Santa Claus nga nagpahiyom kaniya.

“L-Lito i-ikaw...!”

“Oo, Joy! Mibalik ko ning Paskoha! Hingpit ko nang gitalikdan ang buwisit nga GRO! Nakaamgo na ko sa akong sayop! Pasayloa ko sa nahimo kong sala kanimo. Ug isaad ko nga unongan ko na gayud kamong inahan ug anak! Merry Christmas, Joy...!”

Nahagakos si Joy sa gihandum ug gikamingawang bana. Nagginaksanay sila. Hugot kaayo. Ug nabatyagan nila ang lahi ug espesyal nga diwa sa Pasko nga nanguyamang karon sa ilang galamhan. (Kataposan)