Ang Tinagoan

(Kining maong nobela gibase sa matuod nga kaagi ni Dinah.)

Napugos gayod si Padre Gio pagkuyog ni Dinah ngadto sa sulod sa hotel. Daw dili kini buot nga mag-"wala" siya sa gawas, sa may karsada!

Masabot sa lihok sa pari ang kabalisa. Ingon sa nahadlok kini nga basin makit-an sila sa mga tawo nga nakaila kanila sa ilang pagsulod sa hotel. Nagpanglingi si Padre Gio.

"Kun may pakigsultihan ka kanako," ni Padre Gio pa. "Nganong kinahanglan man gyod nga anhi ta dinhi mag-estorya."

"Maayo dinhi kay duna tay privacy," tubag ni Dinah. "Whatever communications nga atong himuon, way makatugaw nato."

"Isulti na kun unsay imong tuyo aron makagawas na ta dinhi."

"Ngano bang magdali ka man? Nahadlok ka nako? Mora ka man og dili lalaki! Ikaw ra may hagdon nga magpadiki-diki. Pero diay ... kun maapiki na, kusog sab kaayong mosubad. Morag iro nga kun makadistansiya modagan pero kun maapiki na gani mohambat."

Wala magtingog si Padre Gio. Miduko kini sa atubangan ni Dinah. Ug gipahimuslan ni Dinah ang higayon. Mipaduol siya sa pari.

"Gimingaw nako nimo, Padre Gio," nagkanayon si Dinah dungan ang pagpanangtang sa mga botunes sa long sleeved nga gisul-ob sa pari.

"D-Dinah, u-utang buot," ni Padre Gio nga mipugong sa kamot ni Dinah. "Taposon na nato kining binuanga."

"Di ko mosugot. Puslan man nga ato na kining nasugdan pwes, ato na lang gyod kining pahinaykan." (Sumpayan pa)