Pag-syur oy!

Nag-ispoting ko ning udtoha. Pilit ang akong hinapay sa pamada Tanglo nga akong gigamit.

Bahala na kinara-an o tinigulang, unsaon man nga maoy akong na-andan. Brown t-shirt nga

may kwelyo, pinarisan sab sa kaping karsonis nga kabardin. Sinaw sab ang kape kong panit nga sapatos nga morag bukobuko sa bakukang.

Gibitbit gihapon nako ang puti nga plastic envelop nga maoy sudlanan kos mga papelis sa yuta, sa akong pagka-real estate broker o tig-deal sa mga yutang igbabaligya.

Apan lain ang tirada ko ning udtoha. Sutaon nako kun tinuod ba gayud nga makigtan-aw nako og sine si Bebe. Nagsabot mi nga magbagat sa Eden Theatre sa Colon.

Suki ko ni Bebe sa iyang painitan sa taboan sa matag buntag. Mapahiyumon siya nako. Parayegon ang tingog. Nagkasuod mi. Parihas mi edaran nga nagpabiling gulang nga ulitawo ug dalaga.

Alang kanako, miabot na ang akong kapuol sa mga babaye sa edad ko nga 50 na pagkakaron. Apan ambot ba nga nahaling man ang akong kurso sa mga babaye dihang nagkasuod mi si Bebe nga katalirongan nako.

"Dong, pag-syur, uy!" Tinuod nang imoha? Manan-aw tag sine...?" Paraygon ang tingog ni Bebe nga misuna nako dihang gihagad ko siya nga manan-aw mig-sine.

"Okey man kaha ka?" Nagkubakoba ang akong dughan nga mipasiklap sa lawom nga kanalkanal sa nag ugdong dughan ni Bebe. Nasabot ko nga nakagusto sab nako ang manindahay og painit.

Tam-is ang pahiyom ni Bebe nga misugat kanako daplin sa asiras sa Eden Theatre. Naghulat na siya kanako.

May lain kong plano, puslan man. Mipara kog taxi. Nanakay kami.

"Asa man ta, Dong...?" sukot ni Bebe. "G V ta!" hunghong ko.

Gikusnit niya ang akong kilid. Parayegong namulong.

"Pag-syur, uy!" (Kataposan)