Sukli sa utang

Hingpit kong mipaundayon sa gihimong palami ni Davon. Nakig-duet sa katugnaw sa kaadlawon ang among mga hangos ug agumod.

Tungod sa kalapoy sa among lawas nakatulog mig balik bisan hapit na ang kabuntagon. Naudtohan hinuon mig kamata. Mitimbakuwas kog bangon ug nagdali-dalig hikay sa among pamahaw aron dili ma-late si Davon sa trabaho.

Igong nahuman kog pangluto, nakahuman na sab og kaligo si Davon. Misulod siya sa among lawak ug nag-ilis. Paggawas niya sa kuwarto, naandam na sab nako ang lamesa. Namahaw dayon mi.

"Mag-abot ta unyang hapon sa SM Megamall sa Mandaluyong," nagkanayon si Davon samtang nagpadayon mi sa pagpangaon.

"Ngano man?" Gipangutana ko siya.

"Suweldo man namo unya. Maghapi-hapi ta."

"Unsang orasa ta mag-abot sa Megamall?"

"Mga 5:30."

Human sa pamahaw, migikan na si Davon paingon sa trabaho. Nag-inusara na sab ko sa balay. Aron dili ko bation og kalaay, nagkalingaw kog pasalida og DVD hangtod sa kaudtohon.

Pasado ala una sa hapon nakahunahuna kong manawag kang Ferdinand. Gimingaw man god ko niya. Nalipay ko dihang nadungog ko ang iyang tingog. Ingon sa nahupay ang tanang kalaay nga mihakop nako.

Alas 4:30 sa hapon. Nag-ilis na kog sapot, pangandam sa akong pag-adto sa SM Megamall segon sa gikasabotan namo ni Davon. Gusto kong mag-una niya didto sa nahisgotang shopping mall.

Untop alas 5:30 nahiabot ko sa Megamall. Pero wala pa si Davon. Miuna na lang kog sulod sa Japanese restaurant nga maoy among gikasabotan nga adto mag-abot. Wala madugay, nahiabot na si Davon. Miorder dayon mig mga pagkaon ug nanihapon.

Human sa pangaon, misulod mi sa department store. Gipalit niya ang nagustohan kong blouse nga pink soda. Gipalitan sab ko niyag sandal nga Celine. Nalingaw ko sa among pagpanuroy niadtong higayona.

Milabay ang usa ka semana human niadto. Usa ka hapon niana, sa pagpauli ni Davon gikan sa trabaho, namatikdan ko nga nagkara-kara siya.

"Andama dayon ang mga sapot nga akong dad-on," niya pa.

"A-asa ka man diay?" Matud ko nga nakugang. (Sumpayan pa)