Ang Tinagoan

(Kining maong nobela gibase sa matuod nga kaagi ni Dinah.)

Human sa lawasnong panagtagbo nila ni Dinah ug Padre Gio nga nahitabo niadtong gabii sa pagsaulog sa barangay Poblacion sa tinuig nga kapistahan, nakamatikod siya nga naglikay na ang pari kaniya.

Ingon sa dili na gyod gusto si Padre Gio nga mausab pa ang nahitabo tali kanila. Apan si Dinah kanunay nangitag higayon nga makalugar sila si Padre Gio. Gusto siyang masubli ang seksuwal nilang panagbagat.

Dihay higayon nga wala na gayod makalikay si Padri Gio kaniya. Sulod sa kompisalanan, gipakigsultihan ni Dinah ang pari. Wala siya makapugong sa pagpanukmat ngadto kang Padre Gio.

"Nganong naglikay ka na man nako?" giingnan niya ang pari.

"Tungod kay dili angay nga magpadayon ang nahitabo nato," tubag sa pari nga mibatig kahikugang kay nagtuo nga usa siya ka mangompisalay.

"Di mahimong likayan ko nimo hangtod sa hangtod."

"Di sab mahimong magpatental ko nimo hangtod sa hangtod."

"Magkita ta ugma."

"Di mahimo."

"Ayaw kog balibari. Kinahanglang makigkita ka kanako ugma."

Wala motingog si Padre Gio.

"May importante kong tuyo nimo. Mag-abot ta ugma sa usa ka dapit," gikan ni Dinah.

"Kun wa ka nay laing tuyo, pahawa na diha," giingnan siya ni Padre Gio. "Duna pay daghang mangompisalay nga akong atimanon."

"Di ko mopahawa kun di ka mosaad nga makigkita ka kanako ugma."

Ingon sa naapiki na usab sa sitwasyon si Padre Gio.

"Asa ta mag-abot?" nangutana ang pari nga daw nahisagmuyo.

"Sa siyudad," daling tubag ni Dinah. (Sumpayan pa)