Gula 43
(Kining maong nobela gibase sa matuod nga kaagi ni Dinah).
Pag-abot ni Dinah sa ilang balay, iyang natukmaan nga serado ang pultahan. Natulog na ang iyang mga ginikanan. Kaganina ra tingaling namauli ang ilang mga bisita. Wala na lang niya samoka ug tugawa ang iyang mga ginikanan nga nangatulog na. Gigamit niya ang iyang duplicate nga yawe sa pag-abli sa pultahan sa balay. Ug misulod dayon siya.
Midiretso siya sa iyang kuwarto. Gihinay niya’g tak-op ang pultahan sa lawak dihang nakasulod na siya. Gihubo dayon niya ang iyang mga sapot. Gusto siyang matulog nga panty ug bra lang ang salimbong sa lawas. Mihigda dayon siya sa mahunolhunol nga kama.
Nahikatulog dayon si Dinah. Apan bisan sa iyang paghinanok, nanambo ang kaham-ot sa pahiyom nga mibathay sa iyang ngabil. Hangtod sa iyang pagkatulog daw gidula-dulaan gihapon sa iyang kaisipan ang matam-is nga mga gutlo sa pagpinarayganay nila ni Padre Gio.
Pagkaugma, naudtohan og kamata si Dinah, kaha tungod sa kalapoy sa iyang lawas nga iyang gibudlay sa pagpakigtagay sa lawasnong kalipay uban kang Padre Gio. Udto na siyang nakagikan sa ilang pinuy-anan paingon sa barangay Bakhaw diin siya nagtudlo sa tulonghaang elementarya. Nag-half day lang siya sa klase. Madasigon siyang milektyur sa kabataan.
Nianang pagkahapon, sa iyang paggawas sa eskuylahan, nalantawan ni Dinah si Rex nga nagbarog sa gawas sa gate sa school campus. Misugat si Rex sa iyang paggawas sa gate. Nagkuyog sila paingon sa balay nga iyang giabangan. Sa ilang pag-abot, naabtan nila si Nang Petring nga naghikay og panihapon sa kusina.
“Pauli na lang, Nang,” giingnan niya ang lagas pagkahuman niinig pangluto. “Ako nay bahala dinhi.”
“Oo, Ma’am,” tubag ni Nang Petring.
Ug mipauli si Nang Petring. Sila na lang duha si Dinah ug Rex ang nahibilin sa balay. -- Sumpayan pa