Sukli sa utang

Gula 144

Sa akong pagtuo, morag dili ko makabaton og problema sa pagpakigrelasyon ko kang Ferdinand kay masinaboton man siya. Ang akong problema mao si Davon kay inanay ko na man nga namatikdan nga may pagkahigpitan kini. May pagka igihan ug seloso usab si Davon.

“Kanus-a ta magkita pag-usab?” Nangutana si Ferdinand samtang naghulat mi’g taxi nga kasakyan atbang sa Araneta Coliseum.

“Manawag lang ko nimo,” maoy akong tubag.

Dihay taxi nga nagsingabot sa among nahimutangan. Hinay kining nagdagan tungod sa humps nga gibutang sa karsada. Gipara kini ni Ferdinand. Paghunong niini sa among tungod, iya dayon kong gipasakay.

“Bye,” nako pa dungan ang paghalok sa iyang aping sa wala pa ko moluwan sa sakyanan.

“Magpaabot ko sa imong tawag,” pabawon nga pahinumdom niya ngari nako human mobalos og halok sa akong aping sa wala pa ko makasulod sa hingpit sa taxi.

Dihang nakapahimutang na ko sa taxi, gi-lock ni Ferdinand ang pultahan niini. Unya gikawayan ko niya sa iyang kamot.

“Asa ta, Ma’am?” Pangutana sa driver kun sa Binisaya pa kay gitinagalog man niya ang iyang sinultihan.

“Sa Pasay,” tul-id kong tubag. “Sa Malibay Street.”

“Unahag diyotay sa Evagelista?”

“Oo. Sa atbang.”

Gipadagan dayon sa driver ang taxi. Hapit na mag-alas 10 sa gabii sa akong pag-abot sa apartment nga gipuy-an namo ni Davon.

Dihang naghigda na ko sulod sa kuwarto, si Ferdinand ang nanumbalay sa akong hunahuna. Nalipay ko nga nagkarelasyon na mi. Bisan tuod kun wala pa ko masayod kun unsa gyu’y mahimong resulta sa akong pagpakigrelasyon niya luyo sa akong pagpakig-live in kang Davon apan wala ko magbasol nga gidawat nako ang iyang gugma. Alang nako, usa ka perfect gentleman si Ferdinand. Buotan siya.

Malinawon ang akong pagkatulog niadtong gabhiona hangtod nabuntag. Sa akong pagmata, maoy una kong nadungog ang pagbagting sa telepono didto sa sala. Mibangon ko ug migawas sa lawak aron tubagon ang telepono.

“Hello?” matud ko.

“Kadugay ba nimong nakatubag?” Gahi ang tingog ni Davon nga akong nadungog gikan sa pikas tumoy sa linya sa telepono. -- Sumpayan pa