Ang palikero

Dinhi sa among lungsod sa Santander nabantog ako nga palikero. Kini tungod kay sa among grupo, ako lang ang daghan og trato. Maibog god nako ang uban kong mga barkada nga lugos ganing makauyab og usa.

Sa pagkakaron, napulog duha ka babaye ang akong uyab. Ang onse kanila pulos na nako nakuha ang pagka babaye. Si Kaycee na lang ang wala motahan sa iyang bandila kanako. Dili gyod magpadala sa kalalim sa among panagromansa. Abtik siyang makapugong sa akong kamot sa higayon nga mohana na ako paghushos sa kataposang salimbong sa iyang pagka babaye.

Lahi si Kaycee sa ubang mga babaye nga akong nauyab. Dili siya motahan sa dakong kasayon sa iyang kaputli ngadto sa usa ka lalaki. Dili sama sa uban nga naangkon nako sa dakong kasayon ang ilang pagka babaye, lakip na ang manghod ug ig-agaw ni Kaycee nga ako usab nga nauyab.

Matud pa sa akong mga barkada, gukdonon ko og babaye. Dili kabalibaran kun mao nay mangulitawo gumikan sa kaguwapo ug sa kamaayong mobulatik.

"Delikado nang imong gibuhat, Art," mipahinumdom kanako si Bong nga maoy labing suod nako sa grupo.

"Basig hipatyan ka sa mga ginikanan o kaha igsoong lalaki nianang imong gipangbiktima sa higayon nga mabuking ka."

"Layo ra na sa tinuod, Bong," matud ko. "Abtik ning imong amigo."

"Abtik lagi ka, ilabi na sa babaye. Apan dili ra ba ato ang tanang panahon."

Usa ka hapon niana, nagtagbo kami si Elsie, ang manghod ni Kaycee, sa payag nga among naandang tagboanan sa daplin sa baybayon. Didto gisaw-an namo ang katam-is sa lawasnong kalipay.

"Magpakasal na ta, Art," nagkanayon si Elsie human namo tagaya ang kalipay.

"Unsay kasal?" matud ko. "Dili pa ko andam magminyo, uy."

"Kun dili ka magpakasal nako, maayo pag magbulag na lang ta."

"U-unsa?"

"Magbulag na lang ta. Sukad karon gitapos ko na ang tanan tali kanato."

Nakugang ko sa hinanaling desisyon ni Elsie.

Apan nadugangan pa gyod ang akong kahikugang. Gibulagan usab ako sa uban pa nakong mga uyab, lakip na si Kaycee.

"Apan unsa may hinungdan, Kaycee?" matud ko nga mihuot ang dughan.

"Nasayod na ko sa tanan, Art," matud ni Kaycee. "Salbahis ka diay nga pagkalalaki. Dili ka kasaligan. "Nasayod na ako nga dose kami ka babaye sa imong kinabuhi. Ug ang labing sakit mao nga lakip ang akong igsoon imo pang gibiktima."

"Dili kana tinuod, Kaycee," misulay ako pagpangulipas.

"Ayaw na lang pamakak, Art. Way aso nga makumkom. Busa sorry kaayo. Gitapos ko na ang atong relasyon."

Gisakitan ko sa gibuhat ni Kaycee. Siya man god ang matuod kong gihigugma. Karon pa ko makaamgo nga dili diay angay paumhan ang pagka palikero. (Kataposan)