Sukli sa utang

Gula 142

Wala na gyod ko makapugong sa akong kaugalingon. Ang kamatuoran mipatigbabaw nga may pagbati gayod ako alang kang Ferdinand. Ug ang maong kamatuoran nangitag kagawasan maong wala ko kapugngi ang paglighot gikan sa akong baba sa mga pulong nga nagpadayag og klarong timaan nga andam na kong makigrelasyon kang Ferdinand.

Gisugot nako si Ferdinand kay dili ko makahimo pagbilanggo sa akong pagbati ngadto kaniya. Bahala nag unsay buhaton ni Davon nako. Bahala nag unsay mamahimong resulta ning lain na sab nakong paghimog komplikadong desisyon. Desisyon nga tinukmod sa kahangol ug kaakop-akopon nako sa mga lalaki. Nasayod kong insanity ang gipakanaog kong hukom.

“Daghang salamat, Editha,” ni Ferdinand pa nga migunit sa akong kamot. “Salamat nga wa ko nimo pakyasa.”

“Di kaha ka magmahay sa imong pagpakigrelasyon nako?” gipangutana ko siya aron pagsuta sa iyang kamatinud-anon.

“Nganong magmahay man? Gimahal ko ikaw. Aron pagmatuod nimo sa kalunsay sa akong gugma, mahimong magminyo dayon ta.”

“Ayaw una, uy. Di pa ko andam.”

Lahi si Ferdinand kang Davon. Si Davon nagsige lag sawsaw nako pero wala pa gyu’y klaro kun kanus-a ko niya pakasli. Morag nakontento na siya nga nakig-live in ko niya. Samtang si Ferdinand, mao pa gani pagdawat nako sa iyang gugma, mitanyag na dayon og kaminyoon.

Apan ambot kaha kun dili ba mausab ang tinguha ni Ferdinand sa pagpakigminyo nako sa higayon nga iyang masayran nga duna na koy ka-live in? Ambot kaha kun dili ba siya ma-turn off kun masayran na niya nga dili na ko virgin? Wala pa ra ba siya masayod ug makaila sa hingpit sa matuod kong pagkatawo.

Apan gipugos nakog wakli sa akong hunahuna kining maong mga pangutana. Dili una ko angay maghunahuna niini aron dili ko mabalaka. For the mean time, kinahanglang mag-enjoy ko sa relasyon namo ni Ferdinand. Ug kinahanglang mag-amping ko nga dili niya masayran ang akong mga tinagoan. Dili ko gustong mausab ang pagtan-aw niya kanako ug mawad-an unya siya’g respeto sa akong pagka babaye. Ug kini gituohan kong mahitabo gayod sa higayon nga masayran na niya ang tanan kong sekreto. Busa kinahanglang mag-amping gyud ko! -- Sumpayan pa