Sukli sa utang

Gula 141

Kun wala pa unta ko mahinayak sa pagpakig-live in kang Davon, dugay ra nakong gisugot si Ferdinand.

Daghan na man gong kagubot nga nahitabo sa akong kinabuhi, sukad sa didto pa ko sa Bicol hangtod na dinhi sa Manila, gumikan sa akong pagpakigrelasyon ug pagpakiglambigit sa lainlaing lalaki.

Sa akong pagpakigrelasyon sa lainlaing mga lalaki, wala pa gyud ko mahinumdom nga may maayong butang nga nahitabo sa akong kinabuhi. Pulos komplikasyon ang gikadulot niini kanako.

Natagbaw man tuod ko sa kalipay nga lawasnon ug natambalan ang akong kahidlaw sa unodnong panginahanglan pero wala sab koy kalinaw. Naputos ko sa panglibak sa mga tawo nga nasuheto sa akong kinabuhi.

Gipanghimaraot nila ang akong pagka sex maniac!

Bisan gani ang akong ig-agaw nga si Josie nasilag na kanako tungod kay gilakip ko man pagtukob ang iyang bana nga si Alva.

Karon nga si Davon na usab ang akong gikarelasyon, inanay ko nang nabatyagan ang komplikasyon. Buhong ko sa materyal nga mga butang. Kontento ko sa among sexual life.

Pero inanay kong namatikdan nga giapiki ko ni Davon. Gusto ko niyang solohon. Kana bang exclusive ra ko para niya. Morag gusto ko niyang hiktan sa liog ug busalan ang akong ilong aron magsunod-sunod lang ko sa iyang gusto. Dili kini ang matang sa kinabuhi nga akong gipangandoy.

Nasuta ko ang kahigpitan ni Davon dihang nasuko siya nga nagabhian ko’g pauli sa apartment nga among gipuy-an gikang nagsuroy sa Glorietta. Mosamot unta tingali kadto ang iyang kasuko kun nasayod pa siya nga gikan kong nakigkita kang Ferdinand niadtong tungora.

Usa sa maka-turn-off nako ang lalaki nga sobra ra kahigpit. Mao nga karon inanay na kong na-turn off kang Davon.

“Nagpaabot ko sa imong tubag, Editha,” namulong si Ferdinand nga maoy nakaputol sa taudtaod gyud nakong pagpamalandong.

“H-ha?” Nahakanga ko nga daw naalimatmatan.

“May paglaom na ba ang akong gugma?”

“A-ambot lang.”

“Unsay ambot lang?”

“Kuan...s-sige...gisugot ta na ka...”

Labihang lipaya ni Ferdinand pagkabati sa akong gisulti. Apan ako mora’g dili makatuo sa nakab-ot kong hukom. -- Sumpayan pa