Ang Tinagoan

Gula 37

(Kining maong nobela gibase sa matuod nga kaagi ni Dinah).

Nakugang si Padre Gio pagkakita kang Dinah nga nagbarog sa gawas sa pultahan sa kombento. Ingon sa nahibulong ang pari kun nganong nahiabot si Dinah sa kombento sa maong oras sa kagabhion.

“Maayong gabii, Padre,” si Dinah maoy unang mitimbaya.

“Maayong gabii sab,” sa pari. “Unsay akong ikaalagad nimo?”

“Pasudla una ko. Mahimo ba?”

Gipasulod si Dinah ni Padre Gio. Sa sala, nanglingkod sila.

“Nganong mianhi ka man sa kombento niining orasa sa kagabhion?” nagpakisayod dayon si Padre Gio.

“Tungod kay nasayod kong ikaw rang usa ang nahibilin karon dinhi,” tubag ni Dinah. Tua sa kalingawan ang imong mga kauban dinhi sa kombento. Naghudyaka sila sa daghang kalingawan.”

“Gipasagdan ko lang silang maglingaw-lingaw. Total, dili man kini kanunay. Kausa ra nis usa ka tuig.”

“Tinuod kana.”

“Ikaw? Nganong wa ka man sab maglingawlingaw?”

“Mao bitaw nga mianhi ko, Padre, kay gusto kong malingaw. Ug sa samang higayon, gusto ko ikaw’ng lingawon.”

“U-unsay buot mong ipasabot?”

Imbes motubag sa pangutana sa pari, mitindog si Dinah ug miduol sa gilingkoran niini. Daw nakugang si Padre Gio dihang milingkod si Dinah sa paa niini. Gihapuhap ni Dinah ang dughan sa pari.

“Nga-ngano kini, Din?” nakapangutana si Padre Gio.

“Angay pa ba god nang ipangutana?” misumbalik pagsukit si Dinah. “Haven’t you read the signal?”

Wala motingog si Padre Gio. Unya inanay nga gipaduol ni Dinah ang iyang ngabil ngadto sa ngabil sa pari. -- Sumpayan pa