Ang Tinagoan

Gula 35

(Kining maong nobela gibase sa matuod nga kaagi ni Dinah).

Sukad niadto, magkanunayan na si Dinah sa kombento sa panahon nga wala siya’y klase. Hapit tanang Sabado ug Domingo nga adto si Dinah magyampungad sa kombento. Kanunay siyang nangitag higayon nga matuman ang iyang gilaraw ngadto kang Padre Gio.

Gituman ni Padre Gio ang gisaad niini kaniya. Gipatudloan niini’g katekismo ang iyang pupils sa Bakhaw Elementary School. Apan dili kini ang importante alang kang Dinah. Gihimo lang niya kining hanig aron mahiduol siya sa pari. Aron magkasuod sila’g maayo.

“Nganong ang pari man gyu’y imong tuyoan?” Gipangutana siya ni Miriam usa ka higayon niana nga nagkasultihanay sila mahitungod sa iyang gilaraw alang kang Padre Gio. “Naa bayay daghang mga lalaki nga wa magsotana.”

“Mas nindot ang nagsotana, Day,” giingnan niya si Miriam. “Dunay challenge. Dunay lahi nga thrill.”

“Ambot lang nimo, Dinah, uy. Wa na gyud ko makasabot nimo.”

“Sagdi lang kun wa ko nimo hisabti. Ang importante nga dia nako ang imong simpatiya. Ikaw ang labing suod kong higala ug ikaw ray akong gisuginlan sa tanan kong sekreto. Ayaw gyud ni ipanabi sa lain.”

“Ayaw kabalaka. Di ko tabian, uy.”

Hangtod nga miabot ang panahon nga ingon sa miduyog ang kahigayonan sa laraw ni Dinah alang kang Padre Gio.

Pista kadto sa Poblacion, ang barangay nga nahimutang sa kinapusoran sa lungsod sa Dalisay. Gabii. Bibo kaayo ang barangay Poblacion. Ug ang tanang mga kauban ni Padre Gio sa kombento migimik. Ang pari ray nahibilin sa kombento. Ug gipahimuslan ni Dinah ang higayon dihang iyang nasayran nga nag-inusara ang pari sa kombento.

Mga alas onse kadto sa gabii sa dihang nanuktok siya sa pultahan sa kombento. Giablihan sa pari ang pultahan...! -- Sumpayan pa