Ang Tinagoan

Gula 35

(Kining maong nobela gibase sa matuod nga kaagi ni Dinah).

Gilahos na gayod ni Dinah ang paghalok kang Padre Gio. Giukoban niya’g maayo ang ngabil niini samtang natulog kini.

Unya, kalit giukang ni Dinah ang iyang ngabil gikan sa ngabil ni Padre Gio dihang milihok ug miagumod kini.

Mipalayo siya’g diyotay sa gihigdaan sa pari.

Nahigmata si Padre Gio. Ug nakugang kini pagkakita kaniya nga nagbarog sa hawanan sa sala. Mitimbakuwas pagbangon ang pari.

“Kaganina ka ra ba dinhi, Dinah?” nangutana si Padre Gio.

“Di pa lang gyud dugay, Padre,” maoy iyang tubag. “Bukas man ang pultahan maong midiretso lang ko’g sulod. Nahinanok ka’g maayo maong wala ko lang ikaw pukawa.”

Wala motubay ang pari sa ulahi niyang gisulti. Mibarog kini ug nananghid nga biyaan una siya’g makadiyot sa may sala. Mitando si Dinah. Ug si Padre Gio mibiya sa iyang atubangan ug mipaingon sa may kosina.

“Unsay akong ikaalagad nimo?” gipangutana ni Padre Gio si Dinah dihang nakabalik na kini sa sala.

“May ihangyo lang unta ko, Padre,” tubag ni Dinah.

“Gusto kong matudloan bahin sa katekismo ang akong pupils. Tingali makatabang ka bahin niini.”

“Di kana problema. Duna tay daghang mga katekista. Mahimong gamiton nato ang serbisyo sa mga lay minister sa pagpahigayon niini.”

“Maayo hinuon kun mao kana, Padre.”

“Sagdi lang. Maghimo ko’g arrangement bahin niini aron masugdan dayon ang pagtudlo’g katekismo sa imong pupils sa labing daling panahon.”

Ug samtang nagpadayon ang ilang panagsulti, gituyo gayod ni Dinah nga dili manapo aron makita sa pari ang hamis kaayo niyang mga paa nga migil-it gikan sa sayal nga iyang gisul-ob! -- Sumpayan pa