Ang Tinagoan

Gula 34

(Kining maong nobela gibase sa matuod nga kaagi ni Dinah).

Ang kaambong ni Padre Gio morag nag-camouflage. Dili mamatikdan sa una mong pagkakita kaniya nga siya guwapo. Dili ka ma-impress kaniya sa una mong pagtan-aw. Kaniya, dili ikapamatuod nga tinuod ang giingon nga “first impression lasts.”

Pero sa ngadto-ngadto, mamatikdan ang natago niyang kaambong. Inanay sab nga madiskobrehan ang kusog niyang charisma ug ang madanihon niyang sex appeal. Ug kini ang namatud-an ni Dinah sa iyang kaugalingon.

Si Padre Gio na usab ang natripingan ni Dinah. Mora ra bag dili kay siya ray nakabaton og interes sa pari. Namatikdan niya nga lakip si Ma’am Elaine, maestra sab nga sama niya pero usa na ka biyuda, morag nagpa-charming sab ngadto kang Padre Gio.

Wala hinuon mabalaka si Dinah nga mapuhalan siya ni Ma’am Elaine. May pangedaron nang gilukdo ang maong magtutudlo ug imposibleng mopatol si Padre Gio niini. Kun rivalry ang hisgotan, seguradong makabentaha si Dinah. Nagtuo siyang siya gyu’y patolan ni Padre Gio.

Gigambalay og maayo ni Dinah ang iyang plano alang kang Padre Gio. Naleksiyon siya sa pag-ayad ni Padre Josh kaniya kaniadto gumikan kay premature ra ang iyang plano ngadto niini. Dili siya gustong masubli pa ang maong kapalpakan. Maong gipahimutang na niya’g maayo ang iyang plano kang Padre Gio. Dili na siya magdali-dali. Dili na siya gustong mosipyat.

Dihay higayon nga miadto siya sa kombento. Domingo kadto sa palis. Abiyerto ang front door maong midiretso siya’g sulod. Natukmaan niya si Padre Gio nga diha ra natulog sa sofa bed nga nahimutang sa sala. Nagmingaw ang kombento. Milingi-lingi siya. Walay laing tawo!

Gitutokan niya sa makadiyot si Padre Gio. Ambongan gayod kini sa iyang panan-aw. Mihinay siya’g tikubo. Unya, inanay niyang gipaduol ang iyang ngabil ngadto sa ngabil sa pari nga nahinanok pag-ayo. -- Sumpayan pa