Sukli sa utang

Gula 134

Pagkasunod Miyerkules, nakahigayon gyud ko sa pagpakigkita kang Ferdinand sa Glorietta sa Makati City. Igo lang nakabiya si Davon sa apartment paingon sa trabaho, milakaw sab ko aron pakigkitaan si Ferdinand. Sa usa ka vegetarian restaurant mi nangaon.

Komportable ko sa nahimutangan namo ni Ferdinand. Gawas nga dili kaayo daghan ang mga kustomer nga misulod sa maong kan-anan, tinted usab ang bildong bungbong niini ug dili mi makita gikan sa gawas. Niini, wala ko mabalaka nga makita mi si Ferdinand ni Davon kun ugaling mahasuroy ang akong ka-live in sa Glorietta.

Wala ko makasabot sa akong kaugalingon. Gibati ko ang tumang kalipay nga nagkakita ug nagkasultihanay na sab mi si Ferdinand. Komportable kong makigsulti niya bisan daku-dako nag gintang ang among pangidaron kay 30 anyos na man siya.

“Nganong wa ka pa man magminyo?” gipangutana ko siya samtang kami nangaon. “Naa na baya ka sa hustong edad.”

“Wa pa man god nako mahimamat ang akong ideal woman,” maoy iyang tubag.

“Pilian ka tingali kaayo?”

“Dili baya. Katungod natong tanan ang pagpamili kun kinsay gusto natong ikauban sa tibuok natong kinabuhi. Pero dili kaayo taas ang akong standard mahitungod sa babaye nga akong pangasaw-on. Ang importante lang para nako mao nga kasaligan ug responsable ang babaye nga akong mapangawasa.”

Wala ko motingog. Akong gihinuktokan kun makapasar ba kaha ko sa sukdanan ni Ferdinand sa pagpili og babaye nga pangasaw-on.

“Tingali kun sugton ko nimo, Editha, maminyo na gyud ko,” takulahaw lang namulong si Ferdinand samtang nagpakahilom ko.

“Naunsa ka diha?” Mao ray akong nasulti kay nakalitan ko sa iyang gipamulong sa akong atubangan.

“I love you, Editha. Kun imong dawaton ang akong gugma, ikaw na ang akong dad-on ngadto sa altar sa kaminyoon.”

Wala ko makatingog. Nakalitan ko ug wala magdahom nga makahigayon si Ferdinand sa pagpangulitawo nako.

Sa hilom nahimuot ko. Duha na silang mipasalig pagdala nako ngadto sa altar sa kaminyoon. Ang una mao si Davon. Ang ikaduha mao si Ferdinand. Unsa kaha kun ako silang lumpongon, no?” -- Sumpayan pa