Salamat na lang

Sorry Ma wa ako magkinahanglan sa matahom mong mansion ug sakyanan, dayong talikod ni Christine sa iyang pursuso nga inahan nga usa ka milyonarya.

 Ang tinuod dugay na kaayo siyang nangandoy nga makapuyo unta og arang-arang nga balay ug makatag-iya og sakyanan. Kay gipul-an na siya og balhin-balhin sa mga suok sa gamay’ng payag ni Tatay Gorio ug Nanay Lucia niya sa higayon nga magbunok ang ulan ug motulo sa ilang busloton nga atop.

Napul-an na pod siya og nilakaw sa iyang tunghaan sa high school nga may gilay-on nga napulo ka kilometro gikan sa ilang payag. Apan ang mansion ug Porsche nga gitanyag sa iyang matuod nga inahan nga si Sunshine dili paigo nga makatabon sa iyang kasilag ug pagdumot ngadto kaniya.

Usa pa lang siya ka adlaw gikan sa iyang pagkatawo sa diha nga gibilin siya diha nila ni Tatay Gorio ug Nanay Lucia niya nga maoy iyang giila nga matuod nga mga ginikanan karon.

Tungod kay wala lagi tugahi og anak sa kahitas-an, nagdako si Christine nga pinangga kaayo nila ni Gorio ug Lucia. Ilang gipatagamtam ang matuod gayod nga pagmahal sa usa ka ginikanan ngadto kang Christine.

Si Sunshine nga nanimpalad sa Estados Unidos human nibiya kang Christine gisuwerte. Kay gipakaslan man siya og usa ka shipping magnate nga Amerikano. Ug gusto niya nga kuhaon si Christine gikan sa mga kamot ni Gorio ug Lucia karon nga milyonarya na siya.

Usa niana ka adlaw nahibalik siya sa pagduaw sa ilang Gorio ug Lucia. Ug nakahigayon og pakig-estorya sa iyang anak.

“Diin ka Ma sa diha nga nagkinahanglan unta ako sa mainit nga dinagaang sa imong inahanon nga pagmahal ngari kanako? Where were you when I needed you most?” pangutana ni Christine nga nisugod na sa pagbakho.

“Ang imong gipasigarbo nga pagpuyos kanako sulod sa siyam ka bulan gamay ra kaayo kun itandi sa 12 ka tuig nga pagpasakit ni Tatay Gorio ug Nanay Lucia. Busa pasayloa ako Ma nga dili mokuyog kanimo sa Estados Unidos ug salamat na lang,” si Christine midugang sa pagsulti.