Sukli sa utang

Gula 132

Nangita gyud ko’g paagi nga kabalibaran ko si Ferdinand. Kinsay iyang adtoon sa convenience store nga akong gitrabahoan kanhi nga hagbay ra man kong mi-resign sa akong trabaho didto.

“Dili lagi mahimo, Ferdi,” giingnan ko siya. “Di ko gustong naay mosundo nako didto sa akong gitrabahoan. Tingalig makit-an ta sa akong boss. Bag-o pa ra ba ko sa trabaho. Maglikay lang ko sa problema.”

“Problema ba god kana?” Giingnan ko niya. “Wa may labot ang imong boss sa imong private life. Ang imong obligasyon isip trabahante mao ra ang pagtuman sa imong mga obligasyon sulod sa store premises.”

“Bisan na. Way kumo sa maglikay. Sabta ko, Ferdi.”

“Basin naibog nang imong boss nimo?”

“Wa, uy. Pataka ka man lang. Gusto lang siya’g hapsay nga pagpadagan sa negosyo maong disiplinado niya ang mga trabahante.”

“Unya, asa man diay ta puydeng magkita?”

“Dinhi lang sa Glorietta. Day off man nako matag Miyerkules. Sama niarong adlawa god.”

“Sige, magkita ta sa sunod Miyerkules.”

“Sure.”

Human masirto ang among sabot, nanggawas na mi sa kan-anan. Sa wala pa mi magbuwag sa pagpanglakaw, iya kong gihatagan sa iyang calling card. Basin kuno’g ganahan kong manawag sa kompaniya nga iyang gitrabahoan. Gidawat nako ang calling card ug gipahimutang sa labing sekretong butanganan sa akong wallet aron dili kini masusihan ni Davon.

Midiretso na ko’g pauli sa gipuy-an namo ni Davon sa Pasay sa akong paggawas sa Glorietta. Nagpahatod ko’g taxi aron madali. Pag-abot nako sa apartment, midiretso ko sa kuwarto ug nag-ilis. Pagkahuman, mihigda dayon ko kay gibati ko ang kakapoy sa pag-window shopping sa Glorietta. Gusto kong makatulog atol sa palis nga dako.

Pero wala ko makatulog. Gihasol hinuon ni Ferdinand ang akong hunahuna. Wala ko makasabot kun nganong mora’g gimingaw ko niya. Nalipay kaayo ko nga nagkaila kami. Nalingaw ko sa among panagsulti kaganina samtang nangaon mi sa usa ka luhong Chinese restaurant.

Nianang pagkagabii, mikuhit si Davon nako samtang nagtupad mig higda sa humok nga kama. Nakasabot ko nga gusto siyang makighilawas nako. Pero wala koy ganang makig-sex niya maong ako siyang gibalibaran. -- Sumpayan pa