Ang Tinagoan

Gula 29

(Kining maong nobela gibase sa matuod nga kaagi ni Dinah).

Samtang init na kaayo ang pagtagay nila ni Rex ug Dinah sa katam-is sa dugos sa lawasnong kalipay, kusog kaayong miagumod si Dinah. Nakatabang sa paghatag kaniyag dugang excitement and pleasure ang iyang pag-imagine nga si Padre Josh ang iyang kapares.

Nag-amping lang siya nga dili makalitok sa ngalan ni Padre Josh samtang nagkamulo sila si Rex pagsaulog sa karaang ritwal sa pagbugtaw sa himayang unodnon. Seguradong mosangko sa dili maayo ang gibuhat nila ni Rex kun masipyat siya ug malakbitan niya ang ngalan ni Padre Josh atol sa mainitong yugto sa ilang pagtagay sa lawasnong kalipay.

“Nganong nasayod ka man nga wa ko moklase karon?” gipangutana ni Dinah si Rex.

“Gikasulti nako ang usa sa imong pupils,” tubag ni Rex. “Lain kuno ang imong pamatyag sa imong lawas.”

“Kaganina ra to. Nawagtang na ang gibati kong pagpanglapoy.”

“Unsa man diay imong gibuhat kagahapon nga gilapoy ka man?”

“Nagsuwat ra god og lesson plan.”

Unya nangahilom sila. Maoy mibanos ang hagkot nilang pagtinutokay sa usag-usa. Taudtaod gayod nga daw nagsultihanay ang ilang mga tinan-awan. Mora’g nagbayloay og mensahe ang ilang pagtinutokay sa usag-usa. Sila ray nakasabot sa mensahe nga gitangag sa ilang tinan-awan.