Ang Tinagoan

Gula 27

(Kining maong nobela gibase sa matuod nga kaagi ni Dinah).

Sa dayon nang pamauli sa mga bata nianang pagkaudto, gipasidan-an sila ni Dinah nga dili na mamalik sa eskuylahan inigkapalis kay dili siya moklase. Gipatuo niya ang mga bata nga lain ang pamati niya sa iyang lawas ug gusto siyang mopahulay.

Apan ang tinuod wala lang gyud siya layhing mopahigayon og klase. Wala siya ganahing molektyur sa mga bata tungod sa kanunay niyang paghunahuna kang Padre Josh. Mora’g mabuang siya sa dako niyang gusto ngadto sa pari. Ug insecured siya kay giisnab sa pari ang iyang beauty.

Naapektohan na ang iyang career isip magtutudlo sa iyang pagpakabuang ngadto sa pari nga daw walay amor ngadto kaniya.

Human sa paniudto, giingnan ni Dinah si Nang Petring nga puyde na kining mopauli ngadto sa pinuy-anan niini. Dili man siya moklase busa siya na lang ang mangunay paghikay sa iyang panihapon.

Mipahulay si Dinah sulod sa iyang lawak. Gusto siyang matulog pero wala siya batiag duka. Si Padre Josh ang kanunay mohadla sa iyang handurawan. Dili gayod malaksi ang pari sa iyang hunahuna. Nagsalimuang siya sa walay pagkutat nga paghunahuna sa pari.

Pasado alas dos nahiabot si Rex sa iyang gipuy-an. Mibatig diyotay nga kahinangop si Dinah. At least, mahikalimot siya’g makadiyot kang Pade Josh gumikan sa presensiya ni Rex.

Aron paglingaw sa iyang kaugalingon, gi-seduce niya si Rex. Si Rex dali ra sab kaayong nakasabot sa iyang signal maong nahitabo gayod ang init nilang pagpinarayganay. Gipahungaw niya ang kahinam nga iyang gibati pinaagi sa matagbawong pagpakighilawas kang Rex.

Ingon sa nabuang gyud si Dinah sa paghinunahuna kang Padre Josh, kay gi-imagine man niya nga si Padre Josh ang mitakobang kaniya! -- Sumpayan pa