Tiaw sa mga maligno

Ang akong igsuon, si Vicente (Vic o Inteng) tua magpuyo sa Banawa, Cebu. Taudtaod na siyang nabiyudo. Giliyukan ang iyang dos andanas nga balay sa habog ug konrektong koral (walo ka tiil ang gitas-on). Binuhat sa puthaw ang main gate sa maong balay ug adunay kandado. Usab, may door bell.

Sama sa namatay na namong inahan, si Brad Inteng mahigugmaon sa mga tanom. Sa idiom pa nga Iningles, siya usa ka green thumb.

Nagkalandrakas lang ang iyang mga tanum -- adunay mga ornamental plants, mga utanon, mga bungahoy, mga orchids ug mga lagutmon.

Usa ka sayong buntag sama sa naandan, giatiman na usab ni Brad Inteng ang iyang mga tanom. Iyang gigunahan kini sa mga sagbot. Gihabokan sa yuta ang mga punoan niini ug gibisibisan og tubig pinaagi sa regadera.

Sa dihang miabot ang oras sa pagtimo (snack), misulod siya sa iyang balay. Gibilin niya ang tanan niyang kahimanan alang sa pagpalambo sa iyang mga tanom.

Ug sa pagbalik pa niya sa tugkaran sa iyang balay, sa dako niyang kakurat ug kahibulong, wala na ang iyang mga gamit para sa iyang mga tanom!

"Kinsa kahay nanghilabot sa akong mga butang, no?" hinay nga nagyamyam sa iyang kaugalingon si Brad Inteng.

Sa pagkasunod adlaw, sayo na pod nga milusad si Brad Inteng diha sa iyang nataran aron pagsugod sa naandan niyang buhat.

Wala damha, hilabihan ang pagpaniga sa iyang mga mata! Ngano man? Tungod kay nakita man niya ang iyang mga kahimanan sa pag-asikaso sa iyang mga tanom!

Ug nakaingon si Brad Inteng sa iyang hunahuna: Dili ba kaha kini tiaw sa mga maligno? (Kataposan)