Ang mestisa sa eskina

Sadya kaayo ang mga batan-ong magbarkadang si Bryan, Rex, ug Codz nga nagsakay sa nagdagang awto nga gipanag-iya ra usab sa nagmanehong si Bryan. Trip sa magbarkada ang maglibotsuroy sa kabukirang bahin sa tibuok lungsod ning probinsyaha. Magbalon sila og daghang mga pagkaon unya magdala og camera ingon man video nga maoy ilang gamiton sa pagkuha og mga nindot nga talan-awon.

Bisan og naabtan sila sa lawom nga kagabhion tungod sa kalayo sa ilang biyahe sa bukirang bahin dapit sa sitio Kalabera, barrio Bukog. Daw wala nila batia ang kakapoy ug kaluya sa ilang lawas tungod sa naglanoglanog nga Bisrock nga ilang gipatokar sa sakyanan ug nunot usab sa ilahang kinomedyahay ug kinataw-anay sa matag usa samtang nagkalingaw usab sa pagkuha og video footage si Rex.

Samtang nagpadayon sila sa ilang dagan, may nakita silang babaye nga nagbarog sa eskina sa may unahan.

“Duna pa diay tawo karong orasa bai, nga mga alas nuybe naman karon sa kagabhion unya mingaw man kaayo kining dapita?” nakapangutana si Codz sa iyang mga barkada.

“Bitaw bai no! Batan-on pa ra ba gyong babaye,” pong pa usab ni Bryan nga puno usab sa katingala.

Unya nipara kini kanila. Gihunong ni Bryan ang sakyanan sa tungod sa maong babaye. Unya giablihan niya ang bintana niini samtang nagpadayon gihapon si Rex sa pagkuha og video ug gipukos kini niya ngadto sa maong babaye.

“Pwede ba makalibre og sakay?” hangyo pa sa maong babaye.

“Hala bai, tan-awa mestisa! Unya nagsuot pa gyod og puti nga blouse nga kutob sa iyang paa!” ni Rex pa, nga daw nakurat sa iyang nakita samtang nag-video sa maong babaye.

“Tutoki baiii, kagwapa mestisa gyud,” matud pa ni Codz, nga hapit na lang motulo ang laway nga nagtan-aw sa babaye.

“Ngano gong balibaran ang grasya miss? Dali diri ug sulod,” sanong pa ni Bryan sa mistisa nga dalaga.

Unya giablihan ni Rex ang likod nga pultahan aron sa pagpasulod sa matahom nga dalaga kay si Codz man ang naglingkod sa atubangan tupad ni Bryan nga gadrayb. Tuod man nisulod ang babaye sa luyo nga bahin tupad kang Rex uban sa tam-is ug makadani nga pahiyom.

“Wow, perfect!” matud pa ni Bryan ngadto sa iyang mga barkada. Ug medyo mitukar ang pagkabarako sa tulo ka mga batan-ong managhigala ug nakapanlad-ok sa ilang laway samtang nagsud-ong sa batan-on ug mistisa nga dalaga.

“Kinsa diay ngan nimo miss?” ni Codz pa nga nituyo lang gyod paglubag sa iyang lawas aron makaatubang sa babaye.

“Gracia,” mubong tubag sa babaye nga pabiling nagpahiyom.

“Asa diay ka paingon Gracia nga kalawom naman sa kagabhion karon.” Dugang pang pagsukit-sukit ni Rex nga anaa sa iyang tupad.

“Sa unahan ra,” laing mubong tubag sa babaye samtang nagkalibatlibat si Bryan sa pagtinan-aw sa puti nga   paa sa mistisa diha sa samin.

Unya sa pag-abot sa unahan may gipangutana ang babaye, “Nakita ba ninyo kanang gamay nga kahayag nga anaa sa unahan?”

“Oo,” nagdungan sa pagtubag ang tulo ka mga batan-ong managhigala.

“Diha ko gi- rape unya gipatay sa mga walay kaluoy nga mga drug adik,” isog nga pong sa babaye.

Nitingkag ang mga dunggan sa mga batan-on sa ilang nadungog gikan sa babaye, unya sa paglingi nila kang Gracia nausab ang dagway niini ug daw nagbitay-bitay ang dugta na nga panit sa nawong ug nikalkag ang buhok.

Sa ilang kahadlok wala na sila masayod sa angay nilang buhaton ug wala na makahimo sa pagmaniobra sa manobela si Bryan. Nahulog ang ilang gisakyan ngadto sa lawom nga pangpang ug nangamatay silang tanan. Perting disgrasyaha nila tungod lang ni Gracia. (Kataposan)