Sukli sa utang

Gula 125

Labihang lipaya ni Davon nga misugot ko sa iyang tanyag nga maglive-in mi. Iya kong gigakos ug gihagkan gumikan sa tumang kahinangop. Gilayog ko niya samtang naghigda ibabaw sa kama.

“Ayaw una pagpauli ron,” nagkanayon si Davon dihang milunga siya sa makadiyot pag-ukob sa akong ngabil. “Mag-overnight ta dinhi sa hotel, okey?”

“Pero si Lotis,” nako pa. “Tingalig mabalaka siya kun dili ko mahiuli sa among gipuy-an. Kagabii ra ba natagbaw siya’g paabot nga mahiuli ko. Unya, mausban pa gyud karong gabhiona.”

“Kinsa man diay importante alang nimo? Ako o si Lotis?”

“Siyempre, ikaw.”

“So you have to stay here with me. Pasabta lang god si Lotis inigpauli nimo ugma.”

Wala na ko magtingog. Gusto sab kong magkauban mi’g dugay si Davon sulod sa usa ka pribadong lawak maong misanong na lang ko sa iyang sugyot nga mag-overnight mi sa hotel.

Unya, ingon sa kalit lang migilok ang akong bugan. Migakos ko ni Davon. Gipadayag ko kaniya ang charming kaayo nakong pahiyom aron paghatag niya’g timaan nga gusto na kong makig-lovemaking niya.

Ingon sa kadali ra sab nga nakasabot ang tonto. Dihadiha gihagkan niya ang akong ngabil samtang mikiat ang iyang mga kamot sa pagpanghinol sa sensitibong mga parte sa akong lawas.

Pag-abot sa tukmang higayon, giangkon na usab ni Davon ang akong pagka babaye. Hingpit kong mitahan kaniya sa akong kaugalingon aron tagamtamon ang kalalim sa panaghilawas.

“Inigpauli nimo ugma sa gipuy-an ninyo ni Lotis, sultihi na lang siyang daan bahin sa atong plano,” giingnan ko ni Davon.

“Oo,” nako pa. “Wa tay problema niya.”

Sa pag-check out namo sa hotel nianang pagkaugma, midiretso na lang ko sa akong gitrabahoan sa Libertad. Gihatod ko ni Davon sa akong gitrabahoan nga tindahan. Nagkasabot mi nga dili lang una magkita inigkagabii aron makapauli ko’g sayo sa gipuy-an namo ni Lotis.

Tuod man, sa akong pagpauli sa balay nianang pagkagabii, gisultihan dayon nako si Lotis nga nagkasabot na mi si Davon nga mag-live in. Nakalitan man apan nakasabot ra si Lotis kanako.

“Pag-ayoayo,” niya pa. -- Sumpayan pa