Unang parokya ni Padre Sol ang lungsod sa San Roque, usa ka dapit nga nahimutang sa habagatan sa Sugbu. Malinawon ang maong lugar. Matinahuron kaniya ang mga lumolupyo.
Batan-on pa si Padre Sol. Husto siya sa gitas-on ug ambongan. Nindot sab og lawas. Macho. Sa sinugdanan, wa sa iyang hunahuna ang pagpari. Apan tungod sa pagminyo sa laing lalaki sa babaye nga bugtong niyang gihigugma, maong misulod siya sa seminaryo hangtod nga nahingpit ang iyang pag-alagad sa Diyos.
Niining adlawa, nagpakompisal siya. Unya naigking siya dihang usa ka babaye ang nagkompisal na kaniya.
"Bendisyoni ako, Padre, kay nakasala ako."
Naila kaayo si Padre Sol sa tingog sa babaye. Sinati na niya ang maong tingog. Ug pinaagi sa gagmay'ng lungag sa bintanilya sa kompisalan, nasuta niya nga wa siya masayop sa iyang pagtuo.
Si Mercy gyod! Kapila na ba magpabatyag si Mercy sa gugma niini kaniya? Kadaghan na. Ug karon, ania kini sa kompisalan.
"Dakong sala ang pagpadayon ko sa paghigugma nimo, Padre. Hangtod dinhi, gisundan tika."
"Ayaw padala sa kahuyang, Mercy. Nagpakasal na ko sa atong Diyos." Hapit di madungog ang tingog ni Padre Sol.
"Nasayod ako, Padre. Maong nia ko, nagpabendisyon nimo sa mao kong sala. Nasayod ka na gyod nga gimahal tika sukad pa kaniadto. Silingan ta. Klasmet sukad pa sa elementary hangtod sa hayiskol. Ikaw ra ang bugtong lalaki nga akong gihigugma."
"Usa ra sab ka babaye ang akong gihigugma, Mercy, ug nasayod ka niini. Sa iyang pagminyo’g laing lalaki, di na mopitik ang akong kasingkasing ngadto sa laing babaye. Ug nasayod ka nga kini ang hinungdan nga nagpari ko. Kalimti ako."
Nadungog ni Padre Sol ang hinay nga pagbakho ni Mercy. Unya mibiya kini sa kompisalan. Lawom nga pangagho ang gibuhian sa pari.
Nanglabay ang mga adlaw. Malinawon na si Padre Sol kay wa na magpakita kaniya si Mercy. Wa na maghasol kaniya. Nagtuo siya nga gidawat na niini ang kamatuoran nga di gyod mahitabo nga matagaan og katumanan ang gugma niini kaniya. Misamot ang pagmahal sa mga tawo kaniya sa dapit nga iyang gialagaran tungod sa kamaayo niyang pagdumala sa parokya. Nahanaw sa iyang hunahuna si Mercy.
Usa ka adlaw nga way misa, nagbasa og Bibliya si Padre Sol sa iyang lawak dihang gisultihan siya sa iyang sakristan nga may nangita kaniya ug naghulat sa sala sa kumbento. Nagdaling migawas ang pari sa lawak. Nakugang siya pag-abot sa sala. Daw di siya makatuo sa iyang nakita. Si Mercy!
Apan lahi ang Mercy ang iyang nakita karon. Usa na kini ka madre.
"Mianhi gyod ko pagtuyo, Padre, aron ipahibawo nimo nga misulod na ko sa monasteryo. Moalagad ko sa Diyos." Mapahiyumon kaayo si Sister Mercy.
"M-Mao ba. Gikalipay ko ang nakab-ot mong hukom, Sister Mercy." Mapahiyumon sab si Padre Sol.
Unya, malipayon silang nagpadayon sa panagsulti. Ug sa maong higayon, ilang natugkad nga managsama silag kapalaran, nga sila alang lamang sa Diyos. (Kataposan)