Ang Tinagoan

Gula 19

(Kining maong nobela gibase sa matuod nga kaagi ni Dinah).

Dihang nakabiya na si Padre Josh, gibalik pagsul-ob ni Dinah ang iyang mga sapot. Ingon sa nablangko ang iyang hunahuna nga misulod sa iyang lawak. Mihigda siya sa kama ug mipitokpitok ang iyang mga mata.

Misamot karon ang iyang interes kang Padre Josh. Mibati siya’g kalagot sa gihimo sa pari kay alang kaniya usa ka dakong insulto sa iyang pagka babaye ang pagbalibad niini sa gitanyag niyang kalipay.

Wala pa mosurender si Dinah. Ingon sa dili siya makadawat sa pag-ayad ni Padre Josh sa iyang pagka babaye. Daw dili siya makatuo nga napakyas siya sa unang higayon sa pag-seduce niya niini.

Mao nga nahagit hinuon pag-ayo si Dinah sa gihimo sa pari. Alang niya, wala pa matawo ang lalaki nga moayad sa iyang katahom. Ug si Padre Josh dili usa ka exemption kun dili usa ka rare challenge sa iyang pagka flirt! Maong ipadayon niya ang nasugdan na niyang laraw alang sa pari.

Lawom nang gabii apan wala pa gihapon makatulog si Dinah. Si Padre Josh ang kanunay niyang gihunahuna. Nagtuo siya nga gibarogan lang ni Padre Josh ang garbo niini isip usa ka pari maong nagpatuo kining lig-on atubangan sa tentasyon pero ang tinuod naibog kini kaniya.

Naghunahuna niini, misamot kadako ang paglaom ni Dinah nga matental ra gayod si Padre Josh kaniya sa umaabot nga mga adlaw.

Naputol ang paghanduraw ni Dinah kang Padre Josh dihang may nanuktok sa pultahan sa iyang kuwarto. Kalit lang siyang gikulbaan. Misantop sa iyang hunahuna nga tingalig may tawong daotan nga nakasulod sa balay.

“Dinah, ablihi ko,” nabati niya ang tingog sa usa ka lalaki didto sa gawas sa pultahan nga giubanan sa pagpanuktok.

Sinati niya ang maong tingog. Kang Rex!

Mibangon si Dinah aron ablihan ang pultahan sa kuwarto. -- Sumpayan pa