Ang babaye nga misugat sa airport

Mahinamon si Farlo nga mikanaog sa ayroplano sa Mactan International Airport. Nagdula-dula sa iyang handurawan si Katrina, ang babaye nga bugtong niyang gihigugma. Si Katrina ang hinungdan nganong nanarbaho siya sa Middle East. Gusto niya nga mahatagan kini og haruhay nga pagpuyo ug engrande sab ang ilang kasal.

Usa ka Engineer si Carlo. Duha ka tuig ang iyang kontrata sa Middle East. Sulod sa maong gidugayon, nakatigom siya’g dako nga kuwarta alang sa iyang pangandoy uban kang Katrina.

Sa iyang pagpauli karon, way kasayoran si Katrina. Gusto niyang sorpresahon ang iyang hinigugma. Gawas pa usab, Adlaw karon sa mga Minatay. Magkuyog sila si Katrina sa pagpanagkot sa sementeryo sa ilang dapit alang sa mitaliwan nang mga minahal nila sa kinabuhi.

Mipasunding karon sa iyang panumdoman ang matahom nga panagway sa iyang hinigugma nga usa ka maestra sa National High School sa ilang lugar sa Kinasang-an, usa ka dapit nga nahimutang sa Amihanang bahin sa Sugbu.

Pag-abot niya sa arrival area, kalit siyang napahunong. Usa ka babaye ang nagwara-wara kaniya ipon sa ubang mga tawo nga naghulat. Si Katrina ang iyang nakita. Nahibulong siya. Giunsa pagkasayod niini nga moabot siya karon nga wa man siya mopahibalo nga mopauli siya, bisan gani ang iyang mga ginikanan ug mga igsoon wa niya pahibaw-a?

Apan kadali ra ang mao niyang hunahuna. Wa na niya tagda nganong nasayod si Katrina sa iyang pagpauli. Mao nay nagpasulabi sa iyang kaugalingon ang kalipay nga nakita niya ang gikamingawan niyang hinigugma.

Nagdali siyang miduol kang Katrina. Iya dayon kining gigakos. Migakos usab kini kaniya.

"Komusta ka na, Kat?" Nagtupad sila sa pagpanglakaw paingon sa gawas sa arrival area aron didto mosakay sila’g taksi paingon sa North Bus Terminal.

"M-Maayo man, Carlo. Nalipay kaayo ko nga mipauli ka karon. Maabtan mo pa ako."

"U-unsay maabtan?"

Nahatutok si Carlo sa masulub-ong panagway sa iyang hinigugma.

"Kalimti ang akong gisulti, Carlo. Ang importante nga nia ka sa Adlaw sa mga Minatay."

Wa na magtingog si Carlo ilabi na nga nanakay na sila’g taksi. Pag-abot sa terminal sa bus, daghan ang mga pasahero nga nag-inilogay sa pagsakay. Naninguha si Carlo nga makasakay. Ug nakasakay gyud siya sa usa ka mini-bus. Apan pagsusi pa niya, wala na si Katrina. Milingi-lingi siya. Wa niya kini makita. Mokanaog unta siya, apan milarga na ang gisakyan niyang bus.

Pagtan-aw niya sa usa ka bus, didto si Katrina. Nagsakay ug naglingkod sa daplin sa bintana ug nagpahiyom kaniya. Igo na lang sa pagpanglingo si Carlo. Nagtuo siya nga wa gyod makasakay ang iyang hinigugma sa nasakyan niyang bus, ug naninguha usab kini nga makasakay sa laing bus.

Wa na lang siya magtagad sa maong hitabo. Total, sa iya pang hunahuna, magkita man sila sa ilang pag-abot sa ilang dapit. Apan labihan niyang kuganga sa iyang pag-abot kay gisugat siya sa iyang mga ginikanan sa masakit nga balita.

"Mao kana, Carlo, namatay si Katrina ganinang buntag. Atake sa kasingkasing."

Nalusno si Carlo sa iyang nahibaw-an. Nakahilak siya sa pagtalikod sa iyang hinigugma niining Adlaw gyod sa mga Minatay. (Kataposan)