Sukli sa utang

Gula 112

Gumikan sa bahad ni Agaw Josie nga mopasaka siya’g kasong adulteryo batok namo ni Alva kun ipadayon gyud namo ang among relasyon, nakahukom ug nagkasabot mi nga putlon na ang pagpakabuang namo sa usag-usa.

Misugyot unta kadto si Alva nga mamiya na lang ming duha sa Manila ug moadto mi sa dapit nga walay nakaila namo. Tungod ba kaha sa iyang kawili nako maong gusto niyang ipadayon ang among relasyon didto sa laing dapit ug biyaan niya ang iyang asawa nga si Josie nga ako ra usab nga ig-agaw.

Apan wala ko mosugot sa nahunahunaang plano ni Alva. Mosamot ang kasila’g ni Agaw Josie nako kun akong uyonan ang sugyot ni Alva. Dili lang tingali si Josie ang masilag nako kondili lakip na si Lisa nga iyang igsuon, ang ilang mga ginikanan nga ako ra sab nga uyoan ug iyaan, lakip na ang uban nakong mga kabanay sa Bicol. Posibleng ila kong panghimaraoton. Basin isalikway na gyud ko sa hingpit sa akong mga ginikanan.

“Dili pa tantong itom ang akong tanlag, Alva,” giingnan ko siya. “Dili ko makahimo sa imong sugyot. May obligasyon ka ngadto kang Josie. Nagkinahanglan siya nimo. Nagkinahanglan sab nimo ang umaabot ninyong anak busa kinahanglang siya’y imong palabihon.”

Wala na mamugos si Alva. Ug kadto na ang kataposan namong panagkita. Bisan nakatultol siya sa gipuy-an namo ni Lotis apan wala na gayod siya moadto didto aron makigkita nako.

Nangaplay na sab ko’g trabaho. Naikog na ko ni Lotis nga dako na kaayo’g nahimong sakripisyo alang nako. Dili ko gusto nga mahimong pabug-at para niya maong nangita ko’g paagi nga makatabang niya sa mga galastohan alang sa nag-una namong mga panginahanglan sa balay.

Sa Manila god, dili puyde nga kanunay ka lang mag-estambay. Dili lalim ang magpakaon og tawo nga walay trabaho, labina sa Manila nga mahal kaayo ang mga palaliton. Mao nga kada adlaw kong nangita og trabaho.

Hangtod nga nadawat ra gyud ko sa giaplayan kong trabaho sa usa ka convenience store sa Libertad, sakop sa Pasay City. Minimum ang akong suweldo. Pabor sab nako ang pagpanakay kay mag-LRT ra man ko gikan sa gipuy-an namo ni Lotis sa Tambunting sa may Abad Santos station dapit.

Promodiser ko sa convenience store. Nalingaw ko sa akong trabaho. Hangtod nga usa ka higayon niana, nahisulod si Davon sa tindahan nga akong gitrabahoan. Nakugang ko sa wala damha namong panagkita human sa taastaas nga kutay sa panahon. -- Sumpayan pa