(Kining maong nobela gibase sa matuod nga kaagi ni Dinah).
Giablihan ni Dinah ang pultahan sa iyang lawak aron pagsusi kun kinsay nanuktok. Si Nang Petring ang nakita niyang nagbarog sa gawas.
"Mopauli na ko, Ma'am," nagkanayon ang lagas. "Nahuman na man nako ang tanang mga buluhaton sa kosina."
"Sige, Nang," ni Dinah pa. "Ug daghang salamat."
Sa nakalakaw na si Nang Petring, gi-lock ni Dinah ang front door. Mobalik na unta siya sa iyang lawak dihang may nanuktok sa pultahan. Nagtuo siyang si Nang Petring ang mibalik maong iya kining giablihan.
Pero dili si Nang Petring ang iyang nakita didto sa gawas, si Rex, ang iyang boyfriend, maoy nakita niyang nagbarog sa gawas sa pultahan. Gipasulod dayon niya si Rex samtang wala pay laing tawo nga nakakita niini. Unya gibalik dayon niyag sera ang pultahan.
"Kaganina ra man ko diha sa gawas," nagkanayon si Rex. "Ngano bang dugay man nga mipauli kadto si Nang Petring?"
"Dugay siyang nakahuman sa iyang trabaho," tubag ni Dinah. "May bisita man god mi kaganina. Dinhi nanihapon ang pari ug ang iyang mga kauban. Maong nagkapuliki intawon si Nang Petring."
Wala na motubay si Rex sa ulahing gisulti ni Dinah. Kalit niyang gisapwang ang dalagang maestra ug gidala ngadto sa kuwarto.
"Ibutang ko, uy," ni Dinah sa paraygong tingog. "Tingalig mahu'g ko."
"Ayaw lang paglangas," ni Rex pa. "Gimingaw na kaayo ko nimo."
Paghisulod nila sa kuwarto, gipahigda dayon ni Rex si Dinah sa ibabaw sa kama. Wala motutol si Dinah sa gibuhat ni Rex.
Wala madugay, managsama na silang walay mga sapot. Mora silag mga sumasalmot sa usa ka oblation run! (Sumpayan pa)