Sukli sa utang

Gula 106

Miligdong ang nawong ni Lotis samtang padayong nagtutok nako. Nabatyagan ko nga may simpatiya gyud siya alang nako.

“May kahigayonan pang magbag-o ka, Editha,” giingnan ko niya.

“Maglisod ko,” maoy akong tubag. “Dili ko makahimo pagkontrolar sa akong kaugalingon.”

“Sa imong pangedaron dili ko makatuo nga ingon ka na niana.”

“Sayo kaayo kong nakig-sex. High school pa ko, dili na ko virgin.”

Ug gisuginlan ko siya mahitungod sa kagahapon namo ni Darwin, ang ikaduha kong boyfriend nga maoy akong gitumbok nga maoy naghatag nako’g addiction sa sex.

Tungod ba kaha kay batan-on pa ko maong maglisod ko’g kontrol sa akong kaugalingon niadtong panahona hangtod nga kanunay na hinuon kong magpangita sa lawasnong kalipay.

“Hot sab diay tong imong boyfriend,” nakaingon si Lotis.

“Mo lang,” matud ko.

Unya, mipalain si Lotis og hilisgotan.

“Nag-ingon ra ba to si Alva nga moanhi siya sa atong gipuy-an aron makigkita nimo,” niya pa.

“Ayaw siya’g paanhia,” matud ko. “Dili na ko gustong magkakita pa kami. Tungod ug alang sa kalinaw sa pagpuyo nila ni Agaw Josie.”

“Wa bitaw ko mosugot nga mokuyog siya nako,” gikan ni Lotis. “Dili ko gustong maapil ko sa inyong eskandalo.”

Pagkaugma, sayo kong milakaw. Una pa gani kong migikan sa balay kay kang Lotis. Misulay kog apply sa usa ka tindahan sa Carriedo nga akong nasigpatan niadtong miaging adlaw sa akong pag-agi nga nagbutang og karatola nga nag-wanted sila og tindera. Wala ko lang kini maaplayi dayon kay nagsugod na man sila’g panira sa akong pag-agi. Mao nga nakahukom ko nga balikon kini karon. Pamasin nga madawat ug makatrabaho.

Pero gidemalas ko. Sa akong pag-abot sa Carriedo, ako na lang nasayran nga may nadawat na silang trabahante. Ulahi na ang akong pagpangaplay. Nasagmuyo ko pag-ayo. Mibalik na lang ko sa balay nga gipuy-an namo ni Lotis sa Tambunting.

Nianang pagkahapon, samtang nagdigamo ko sa panihapon namo ni Lotis, nakugang ko kay may lalaki man siyang gikakuyog sa iyang pag-uli. Gikulbaan ko dihang nakita ko ang maong lalaki. Si Alva! -- Sumpayan pa