Ang Tinagoan

Gula 4

Nianang pagkahapon, miadto si Dinah sa kombento. Nagdala siya’g pagkaon. Gipangunayan gyud kini niya’g luto alang kang Padre Josh.

Gisugdan gyud dayon ni Dinah ang iyang lakang aron pagtental kang Padre Josh. Siya’y nangitag paagi nga magkasuod sila’g maayo.

Gitagad sad siya’g maayo ni Padre Josh. Hilom kining gikahimuot ni Dinah. Alang niya, pasiuna kini sa iyang kalamposan.

“Maestra ka diay?” Giingnan siya ni Padre Josh samtang sila maduloton nga nagkukabildo sa sala sa kombento.

“Oo,” paraygong tubag ni Dinah. “Tua ko ma-assign sa usa ka layo nga barangay. Hasol lagi kaayo.”

“Hain ka man magpuyo didto? Aw, mag-ulian ka ba kada adlaw dinhi sa lungsod?”

“Dili. Nag-abang ko’g balay didto. Matag weekend ra ko mouli dinhi.”

“Enjoy man sab kaha ka, didto?”

“Enjoy man hinuon. Nindot ang atmosphere didto. Mahigalaon sab ang mga molupyo sa maong dapit. Pero kun may opportunity, mobalhin gyud ko dinhi sa lungsod. Nagpaabot lang ko nga may puwestong mabakante.”

Igo lang miyango-yango ang pari sa iyang gisulti.

“Bisitahi unya ko didto, Padre, kun makahigayon ka,” giingnan niya ang pari. “Malipay ko kun makaduaw ka kanako didto within this week.”

“Dili ko mopasalig,” ni Padre Josh pa. “Pero paningkamotan nako. Gusto sab kong makaadto sa maong barangay sanglit nahisakop pa man kini sa parokya sa Santa Angela diin ako na karon ang padre kura.”

Pagka-Miyerkules, nahiadto ang gipaabot ni Dinah. Mibisita si Padre Josh sa barangay Bakhaw diin didto sab siya nagtrabaho isip magtutudlo. Nagmisa si Padre Josh didto. Pagkahuman sa misa, gidala ni Dinah ang pari sa balay nga iyang giabangan. -- Sumpayan pa