Sukli sa utang

Wala gyod ko makahunahuna kun unsay angay kong buhaton. Wala pa man god ko masuheto pag-ayo sa Manila. Mao ray akong natultolan ang canton factory nga akong gitrabahoan ug ang mga motel nga kanunay namong sudlan ni Alva ingon man ang mga department stores sa Quiapo, Divisoria ug sa Caloocan City.

Dihang nabuntag na, misakay kog jeep nga mobiyaheg Divisoria. Mikanog ko sa 5th Avenue. Mao gyoy pagpangabli sa canton factory apan wala pay mga trabahante nga nangabot gawas lang nako. Ang janitor pa lang maoy nagtikawtikaw nga nagtiwas sa pagpanglimpiyo.

"Ang aga mo," buyag sa guwardiya sa canton factory.

"Wala namang gagawin sa bahay," maoy akong tubag. "Kaya, mas mabuti pang pumasok ng maaga."

"Sa bagay, mas mabuti 'yung maagang pumasok kay sa ma-late dahil sa traffic."

"Oo nga, e."

Apan ang tinuod, misayo kog adto sa factory kay wala gyod koy laing nahunahunaan nga adtoan gawas sa maong dapit.

Nag-ulhos pagpangabot ang mga trabahante sa canton factory nianang pagka alas siyete sa buntag. Nakapamahaw na ko sa kan-anan sa duol sa trabahoan. Wala madugay, nagsugod na mi sa among mga buluhaton.

Apan daw wala ko sa kaugalingon samtang nagtrabaho. Nahasol ang akong hunahuna sa nahitabo kaganinang kaadlawon sa balay sa akong ig-agaw. Wala ko magdahon nga masakpan mi si Alva ni Josie nga iyang asawa nga diha sa aktuwal nga panaghilawas sulod sa akong kuwarto.

Misantop sa akong hunahuna nga posibleng nakamatikod na si Agaw Josie sa kalihokan namo ni Alva maong iya ming gipanid-an sa hilom. Hangtod nga nasakpan gyod mi niya sa akto nga naghilawas.

Nianang pagkaudto, nangita gyod kog paagi nga magkasulti mi si Alva. Gusto kong masayod kun unsay nahitabo sa ilang balay sa ako nang pagbiya kaganinang kaadlawon.

"Nasuko pag-ayo si Josie," nagkanayon si Alva kun sa Binisaya pa kay gitinagalog man namo ang among panagsulti. "Sangko kuno sa langit ang iyang kahiubos nako. Nasilag sab kuno siya nimo."

"Unsa man ang iyang plano karon?" Nagpakisusi ko.

"Ambot lang. Wa pa ko masayod."

Apan wala magpalibak si Josie. Kalit kining mitungha sa canton factory ug nakakita siya namo ni Alva nga nagsultihanay. (Sumpayan pa)