Sukli sa utang

Gula 99

Samtang nagtan-aw si Agaw Josie og TV sa gamay’ng sala-sala sa balay, misulod ko sa akong lawak ug nag-ilis. Pagkahuman, migawas ko sa lawak ug mipahimutang sa bakanteng silya atubangan sa telebisyon.

“Panihapon na, Gaw,” giingnan ko ni Josie. “Pasado alas nuybe na ra ba.”

“Busog ko, Gaw,” nako pa. “Nanihapon na ko sa gawas. Nag-sale man god sa Issetan maong nag-window shopping ko didto. Dihang naabtan ko’g kagutom, nangita ko’g kan-anan sulod sa mall ug mikaon.”

Wala na motubay si Josie sa ulahi kong gisulti. Mipadayon na siya pagtan-aw sa teleseryeng gipasalida sa ABS-CBN. Mitan-aw na lang sab ko sa salidang iyang gitan-aw. Ug dihang mibati na ko’g duka, misulod ko sa kuwarto aron matulog na.

Igo lang kong nakahigda, nabati ko ang tingog ni Alva. Nahiabot na diay kini. Nagsultihanay sila’g makadiyot si Josie. Gipalong na ang TV. Madungog ko ang ilang tingog gikan sa lawak nga akong nahimutangan pero dili nako maklaro ang ilang gipanagsultihan. Ang ako lang nasabtan mao nga morag may gituki si Josie bahin sa suweldo ni Alva.

Wala ko na lang hatagi’g bug-at nga pagtagad ang ilang panagsulti. Alang nako, dili ko angay mag-apil-apil sa bisan unsang hilisgotan nga alang lang nilang magtiayon. Gibukotan ko ang akong lawas sa habol aron makatulog na ko. Ug wala madugay, nahinanok ko.

Apan nahigmata ko nianang pagkakaadlawon dihang akong namatngonan nga may tawo nga nakasulod sa akong lawak. Mosinggit na unta ko kun wala pa nako mailhi dayon ang maong tawo. Si Alva!

“Ayaw pagsaba,” hagawhaw ang iyang tingog. “Tingalig makamata si Josie.”

“Nganong nakasulod ka man dinhi?” Hagawhaw sab ang akong pangutana.

“Ambot, ba, uy. Mogikan na man unta ko paingon sa trabaho. Pero paghitungod nako sa pultahan sa imong kuwarto, wala sa hunahuna nga gisulayan ko kinig abli. Nalimtan tingali nimo’g lock kay naabli man. Mao nga misulod ko.”

“Unya, mag-unsa man ta ini ron?”

“Ato lang dali-dalion. Alas tres pa man sab. Duna pa tay igong panahon.”

Wala na ko magdaghan og langas. -- Sumpayan pa