Sukli sa utang

Gula 97

Nagkasulti gyud mi si Alva nianang pagkaudto human sa pangaon. Nakita ko siya nga misulod sa office sa among agalon nga Insek. Giatangan ko siya nga mogawas. Tuod man, nagkasulti gyud mi’g kadiyot.

“Magkita na sab ta unya,” giingnan ko siya.

“Unsa?” Daw nakugang siya sa akong gisulti.

“Ayaw kog balibari. Magpaabot gihapon ko nimo unya sa gawas sa terminal sa Baliwag Transit.”

“Dili maayo nga adto gihapon ta didto mag-abot. Tingalig may makakita nako. Duol ra ba na dinhi sa atong gitrabahoan.”

“Asa man diay ta mag-abot?”

“Sa Tutuban Center lang. Maayo didto kay pabor nako’g diyotay kay sa Pritil man ko ron maningil.”

“Wa ko makatultol nianang lugara.”

“Sakay lang og jeep paingon sa Divisoria. Dali rang tultolon ang Tutuban Center kun tua na ka didto.”

Human sa trabaho nianang pagkahapon, nagdali-dali ko’g gawas sa canton factory. Milabang ko sa pikas tampi sa karsada ug didto nag-atang kog jeep nga kasakyan paingon sa Divisoria.

Mibati ko’g diyotay’ng kalagot kay dugay kong nakasakay. Pulos puno ang mga jeep nga nangagi sa akong tungod. Kusog man god ang sakay sa ingon niadtong oras kay tinggawas sa mga trabahante sa lainlaing mga buhatan ug mga establisamento.

Kilumkilum na sa pag-abot nako sa Divisoria. Naniga na gani ang mga sugang dagitabnon sa mga tindahan. Natultolan dayon nako ang Tutuban Center nga giingon ni Alva nga adto mi magkita. Mosulod na unta ko sa maong establisamento sa dihang may kamot nga midapi sa akong abaga. Si Alva diay!

“Mangaon una ta,” sugyot ni Alva.

“Ikaw ang mag-igo,” dali kong tubag.

Nangaon mi sa usa ka fastfood outlet sulod sa Tutuban Center. Pagkahuman, nanggawas dayon mi. Mipara si Alva og taxi. Nagpahatod mi ngadto sa Mabini. Didto mi-check in mi sa usa ka motel. -- Sumpayan pa