Engkantada nga ikugan

Nganong nagpatuga ka man og pasalig Miyoy, sa pagbaton nianang dumaga nga baka ni Kumpare Siyoy, nga kaliwat gikan sa Australia, nga dili man diay nimo hikotaon sa pagtugway?" sayo kaayo nga naggahot si Nisya sa iyang bana nga niadtong tungora wa pa mobangon gumikan sa kahubog. "Kay unsa na man diay'ng orasa Nisya?" diha pay kanguhal sa tingog ni Miyoy nga miahat og kipatkipat sa duha niya ka mata. "Alas nuybe na pasado!" mubong tubag sa asawa.

Sa kabag-ohay pa god nga nagtipon ang magtiayon ning ilang balangay sa Balungag, nga sakop ning ilang lungsod sa San Fernando, wa gayod sila batia og kalisod sa inadlaw nilang kunsomo ilabi na nga gipadayon ni Miyoy, og ugmad ang iyang baol nga kabilin pa sa iyang naanhing nga amahan.

Gani, gumikan sa abot nilang mga utanon ug uban pang mga lanubo nga lagutmon, kanunay nga magkinagang og baligya si Nisya matag adlaw'ng Domingo, atol sa tabo ning ilang tiyanggihan sa lungsod sa San Fernando. Bisan anaa pa ang pamaol sa kalawasan ni Miyoy, iya na karon nga giguroy ang dumaga nga baka nga iyang binatnan kang Kumpare niya Siyoy.

Samtang nanibsib na sa pagsugod ang maong dumaga nga baka, iyang nahinumdoman ang kahugot sa iyang pasalig ngadto sa iyang Kumpare.

"Magpasalamat gayod ako og dako uyamot Pre Siyoy nga imo akong pabatnon sa imong dumaga nga baka nga kaliwat gikan sa Australia!" hupong sa kamatinud-anon ang pasalamat ni Miyoy ngadto sa iyang Kumpare.

"Basta ikaw Pre Miyoy ... dili ko ihikaw kanimo aron lang gayod ikaw makaliwat og imported nga baka!" daling tubag ni Kumpare niya Siyoy.

Ambot unsang pagkahitaboa, nga sa tanang gilawig ni Miyoy ang dumaga nga baka sa labong nga kakugnan, gisaog man hinuon siya sa kaduka hangtud nga siya nakatulog, sa may punoan nga gamot sa kamansilis.

Taliwala sa iyang maanindot nga katulogon, maoy iyang namatngonan nga giduol siya sa usa ka maanyag nga Engkantada, diin gikupogan siya og hawok.

Giganahan si Miyoy ug iyang gigakos sa tumang kahugot diin mao na lamang ang iyang namat-an sa pagbundak sa ulan, nga ang iya diay'ng baka nga binatnan ang naunay niya og romansa nga gipakaingon niya og Engkantada nga ikogan. (Kataposan)