Ang buang nga si 'James Bond'

Langas kaayo nga nag-inom ang upat ka managhigala nga sila si Vic, Rod, Rey ug Bert sa tindahan ni Inse Lalang. Matag karon ug unya mohugyaw sila pagpangatawa. Nalingaw sila sa ilang pagbugalbugal kang "James Bond", ang buang nga kalit lang mitungha dinhi sa among lungsod.

Gikan sa beranda sa balay nga akong nahimutangan, klaro kaayo sa akong paglantaw ang gibuhat sa upat ka bugoy kang James Bond. Napugos pagsayaw ang buang kay gihulga man siya sa upat nga kulatahon kun dili mosayaw. Samtang nagsayaw, si Rod mohana paghubo sa bulingon nga sako nga iyang gitapis.

Nahinaway ako sa gibuhat sa upat ka bugoy ngadto sa buang. Alang kanako, labaw pa silang buang kay ni James Bond. Kun nalisoan man sa kabuot si James Bond, mas maayo pa siya kay sa upat ka managhigala nga mga bastos. Kay bisan usa ka buang si James Bond apan dili man maghubo kun ilang pahuboon. Kutob lang sa pagsayaw ang iyang himuon.

Naghatag og misteryo ang kalit nga pagtungha ni James Bond sa among lungsod. Walay usa nga nakaila kaniya sa among dapit. Nakita na lang siya usa ka buntag niana nga naghigda sa usa ka lamesa sa merkado. Walay nasayod kun taga diin siya. Dihang gipangutana siya kun unsay iyang ngalan, miingon siya nga siya si James Bond dayong bahakhak og katawa. Mao kadto nga gitawag na lang namo siyag James Bond.

Sukad niadto kanunay nang makita si James Bond nga maglakaw sa kadalanan sa among lungsod. Adlaw ug gabii siyang magbagdoy paglakaw. May mga higayon lagi --sama karon- nga masakpan siya sa upat ka bugoy ug bugalbugalan siya pag-ayo.

Nakita ko si James Bond nga mibiya sa tindahan ug misubay sa dalan nga moagi sa tungod sa akong balay.

Mitindog ko gikan sa gilingkoran nga silyang tuwang-tuwang ug nanaog sa silong sa balay. Gihulat ko ang pag-agi ni James Bond. Wala madugay nagdangadanga na siya. Ako siyang gitawag. Mihinay pagduol kanako ang buang.

"Nga-ngano, Sir," niya pa. "Na-naa imo tu-tuyo?"

"Nganong moduol ka man gyod nila ni Vic nga bugalbugalan ka man lang nila?" matud ko.

"Si-sige lang, Sir," nagkanayon si James Bond. "U-ugma di-dili na sila bu-bugabugal nako..."

"Unsay buot mong ipasabot?" gitutokan ko ang bulingit niyang panagway.

"Ba-basta... u-ugma di-dili na si-sila bu-bugalbugal nako," dayon mibiya siya sa akong atubangan. Mipaturatoy paglakaw nga nagpunay og katawa. Ug didto sa unahan misinggit siya! "Ako si James Bond, ang kaaway ni Dr. No!"

Nianang pagka gabii, human sa panihapon naglingkod na usab ako sa among beranda aron paghanggap og lab-as nga hangin. Wala madugay sa akong pagkahilom nakabati akog sinagadsad sa mga tiil didto sa karsada. Midungaw ko. Maoy akong nakita si James Bond nga miagi sa tungod sa among balay.Nailhan ko siya tungod kay nadan-agan man siya sa kahayag sa sugang dagitabnon sa poste sa elektrisidad nga nahimutang sa atbang sa among balay.

Sa hilom nabalaka ko sa paglatagaw ni James Bond panahon sa kagabhion. Delikado kun mataymingan siya sa mga adik sa among lungsod. Midagsang naman god pag-ayo ang drogas sa among dapit. Wala masumpo sa kapolisan ang pagpayuhot niini. Hinungdan nga daghan na ang mga batan-on nga nagumon sa maong bisyo.

Dihang nagmingaw ang kalibotan misulod ko sa lawak namong magtiayon kay gibati na usab akog duka. Igo lang akong nakahigda tupad sa akong asawa, nakignat ko. May nabati kong butobuto. Ingon sa dili kaayo layo ang gigikanan sa maong butobuto sa among balay. Taudtaod gayod ang paglanog sa mga butobuto. Morag may nagpinusilay.

Nianang pagka buntag nagkaguliyang ang mga tawo. Aduna kunoy gipangdakpan nga mga tigpayuhot og drugas kagabii. Ang duha napatay kay misukol. Ang duha nadakpan nga buhi. Wala ko magdahom. Si Vic diay ug ang iyang mga barkada maoy mga pusher sa among dapit. Ug daw dili ko makatuo kay ang nakadakop kanila mao diay si Major Jade Moral sa PDEA nga nailhan lang namo sa ngalan nga "James Bond". (Kataposan)