"Incubus"

Gula 133

Gikan sa buhatan sa kapolisan, namauli mi si Dirk sa among gipuy-an nga nagsakay na sa owner-type jeep nga gipangunayan niya pagmaneho. Nagsunod namo ang Innova nga gisakyan sa upat ka polis nga among back-up. Misugot ang labaw ni Dirk sa iyang hangyo nga magpakuyog mig mga polis. Gipasabot niya ang iyang labaw nga ako maoy target ni Bradley Bagutsay busa angay kong bantayan pag-ayo.

Pag-abot namo sa balay, midiretso ko sa kuwarto namo ni Dirk. Gibiyaan ko lang siya nga nakigsulti pa sa upat ka polis. Sa akong pagtuo, nagsabot sila kun unsay angay nilang buhaton kun ugaling motungha si Bradley.

Sayo ming nanihapon. Pagtikyop sa kangitngit, mipahimutang na ang upat ka polis sa tagsatagsa nila ka puwesto. Nagbantay sila sa gawas sa balay. Pulos tag-as ang ilang mga armas. Wala sila mokompiyansa sanglit gipasabot man sila ni Dirk nga dili ordinaryong tawo si Bradley kay gisudlan man kini sa incubus, ang daotang espiritu nga nagbahis ug nagsamok-samok sa among pagpuyo.

Diha ra mi si Dirk sa sulod sa among lawak. Iya kong gibantayan og maayo. Ingon sa dili na makatugot ang akong bana nga mahulog ko sa mga kamot ni Bradley sa laing higayon. Giandam niya kanunay ang iyang armas.

Wala ko makatulog bisan hapit na ang tungang gabii. Nagdibal ang akong hunahuna. Gusto kong tukawan ang kagabhion uban ni Dirk. Dihang hapit na ang tungang gabii, gihatdan ni Dirk og kape ang mga polis nga nagbantay sa gawas sa balay. Igo lang siyang nahibalik sulod sa among kuwarto, nakabati mig butobuto didto sa gawas. Sagunson nga butobuto nga sipa kaayong milanog sa mingaw nga kagabhion.

“Dinhi ka lang,” matud ni Dirk. “Magsusi ko.”

“Mokuyog ko nimo,” nako pa. “Mahadlok ko dinhi.”

Nanggawas mi si Dirk sa kuwarto ug nanaog sa silong. Paghimuntog gyud namo sa sala, naabli ang front door. Ug among nakita si Bradley nga misulod. Gipunting dayon kini ni Dirk sa gigunitan niyang armas. -- Sumpayan pa