Wakwak gipaak sa duha ka kabog

Pagkamatay sa asawa ni Daniel ingon sa kanunay na lang siyang magmagul-anon. Dili na gani siya moadto sa tindahan nila ni Isong-Abyang nga maoy suki niyang imnanan sa tuba.

Apan karon nga pipila na ka buwan ang milabay, wa na gyuy nakakita kang Daniel nga mogawas sa ilang tugkaran. Naguol man god siya pag-ayo kay maayo pa mag lawas kadtong iyang asawa ug wala gani siya makadungog nga magmulo kadto sa iyang lawas kay kugihan man kadtong iyang asawa.

Pero, matud pang Ingko Kayong giawok kuno ang iyang asawa. Gisuyopan og dugo samtang natulog kini. Mao diay’ng nangluspad na lang pag-ayo. Ug ang ilang gidudahan mao si Awang, ang biyudang gidungogdungog nga panlibonan ug mao kini kunoy gibinlan sa bana niining ungo.

Silingan ra nila’g balay si Awang. Makita man gani gikan sa ilang bentana kanang manambo siya. Apan, kuwang pa gihapon siya’g pagtuo nga si Awang maoy nag-awok sa iyang asawa nga Lily.

Busa, kay nag-inusara na man lang siya, gilingaw na lang niya ang iyang kaugalingon pagpananom og mga utanon.

Unya, wala siya’y problema sa mga prutas kay gilibotan man sa mga bungangkahoy ang ilang balay. Dunay atis, bayabas, nangka, cico-carabao, mangga, chicos, kolo, kapayas ug uban pa.

Gani, kun manghinog na ang mga prutas morag pistahan man sa mga kuwaknit ug kabog. Kausa, kilomkilom kadto dunay duha ka dagkong kabog nga misakdap kaniya dayon mikumpayot kini sa may sanga sa bayabas nga sa iyang paniid ni Daniel gustong makighigala kaniya. Morag anak kining mga kaboga kay magpahikap man ni Daniel. Ug hangtod nga anad na kaayo ang duha ka kabog kang Daniel. Ug gisultihan ni Daniel ang duha ka kabog nga sila na ang mangaon sa mga prutas kun dunay mangahinog. Morag nangalipay ang duha ka kabog.

Pagka gabii, samtang natulog si Daniel ug nahinanok pag-ayo may nangaskas didto sa atop nga nipa sa iyang balay. Ang mangtas diay nga anananggal nga buot nang mobalbal kang Daniel pinaagi sa pagtunton niini sa taas niyang dila nga morag pisi kataas. Sa natugkad na ang dila sa anananggal sa tiyan ni Daniel, kalit lang nga nakasinggit ug mitig-ik ang anananggal kay gilabkan sa duha ka kabog.

Midali pagbangon si Daniel ug nanaog sa silong aron susihon kun unsa kadtong kasaba didto sa atop. Tuod maoy iyang nakita ang usa ka anananggal nga puwerte nang bun-oga nga gitabangag paak sa duha ka kabog ug iyang nasuta ug nailhan nga ang duha diay niya ka mga higalang kabog ang milabok ug mipaak sa anananggal nga luya na kaayo ug dayon natagak kini sa may balisbisan sa balay.

Taudtaod nangabot ang mga tanod ug nanagko ang ilang mga mata sa ilang nasaksihan. Mitumaw pod si Ingko Kayong nga midagpi sa abaga ni Daniel.

“Tan-awa, Undo, tan-awa kun kinsa kanang maong wakwak, di ba si Awang na,” ni Ingko Kayong pa nga mikunot ang agtang. “Karon nakabawos ka ra gyud sa wakwak nga anananggal...”

“Di ako ang nagpatay kaniya, Ingko, kundili ang duha ka higala kong kabog,” hinay ang tingog ni Daniel, ug didto sa may sanga sa santol iyang nakita ang duha ka kabog, nagkumbitay. -- Kataposan