Sukli sa utang

Gula 88

Misulay pagsukol si Peter kang Kuya Ethan apan wala gyud kini dag-anan sa akong maguwang. Ang iyang gihimo nagdugang lang hinuon sa mga bun-og nga iyang nadawat gikan kang Kuya Ethan. Nanghuboy ang iyang nawong ug nagkadugo ang iyang baba.

Best friend ni Kuya Ethan si Peter pero hingpit nga nabugto ang kasuod sa ilang pagtinagdanay tungod nako. Maayo gani kay wala ikiha ni Peter si Kuya Ethan tungod sa pagbun-og niini kaniya. Wala na gyud hinuon mopakita si Peter kanamo.

Bisan og dako na kaayo ko’g perdisyon nga nahimo sa among pamilya gumikan sa akong pagpaulipon sa unodnong kahangol, wala gyud mausab ang akong hunahuna. Naluoy ko sa akong mga ginikanan ug mga igsuon nga naapektohan sa akong gibuhat pero dili gyud ko makakontrol sa akong kaugalingon. Maglisod gyud ko pagbuntog sa kaulag nga miulipon kanako.

Hangtod nga miabot ang higayon nga, tungod ba kaha kay naputos na sa kaulaw sa salawayon kong binuhatan, si Papa Augusto nalandig sa tambalanan. Nasulod siya sa intensive care unit kay talandogon kaayo ang iyang kahimtang. Giatake siya sa sakit sa kasingkasing.

Ang hinungdan nga giatake ang akong amahan mao ang among panaglalis. Iya man god kong gikasab-an kay nakadungog kuno silang Mama og tabi-tabi nga may gikabuangan na sab kuno kong lalaki nga driver sa Penafrancia Bus Line. Milimod ko bisan tinuod. Hangtod nga, sa unang higayon, nakiglalis ko kang Papa aron barogan ang bakak kong gipamulong.

Wala madugay sa among panaglalis, kalit lang mingislo ang nawong ni Papa sa tumang kasakit dungan ang pagpugong sa iyang dughan. Gidali siya’g tabang ni Mama. Sa nakita nga delikado ang iyang kahimtang, gidali namo siya pagdala sa labing duol nga hospital. Labihang guola sa akong Mama sa nahitabo sa akong amahan. Lakip ko naguol usab.

“Ikaw ang nakaingon niining tanan, Editha,” gisudyaan ko ni Mama Clemencia samtang nagtindog mi sa gawas sa intensive care unit. “Kun unsa gani mahitabo sa imong amahan, ikaw gyud ang angayang basolon. Dili ko gyud ikaw mapasaylo. Timan-i kana!”

Wala na lang ko magtingog. Wala ko na lang tubayi ang kalagot sa akong inahan. Tinuod man sab nga akoy sad-an sa nahitabo kang Papa. Kun wala pa tingali ko mosukol niya sa pakiglalis, dili tingali siya atakehon sa sakit sa kasingkasing.

Naabli ang pultahan sa ICU. May doktor nga migawas. Seryoso kaayo ang panagway niini. Kalit lang kong gikulbaan. -- Sumpayan pa