Sukli sa utang

Sila si Kuya Ethan, Kuya Harvey ug Kuya Morris nakabati sab sa mga tabi-tabi sa mga tawo nga nakaila nako ug nasayod sa akong kakundatan. Naulaw sila’g maayo sa mikatap nga mga hungihong bahin nako.

Dihay higayon nga mipauli si Kuya Morris sa balay nga nagkadugo ang baba. Nakasugat diay siya’g engkuwentro tungod nako. Wala siya makaantos sa kaulaw sa mga tabi-tabi nga ako usa ka maniac. Nakigsumbagay siya sa mga lalaki nga mibugalbugal niya tungod nako.

“Bantayi nang imong manghod, Bay,” miingon kuno ang usa sa upat ka lalaki nga iyang gikaengkuwentro. “Mora man na siya’g tsinelas nga bisan kinsa lay mosul-ob.”

Sa kalagot ni Kuya Morris, gidasmagan dayon niya ang lalaki. Pero siya’y nakulatado kay mitabang man pagbun-og kaniya ang tulo ka kauban niini. Mao nga pag-uli ni Kuya Morris sa balay, akoy iyang gipahimungtan. Natamparosan gyud ko niya.

“Kundatan kang dako,” gahi kaayo ang tingog ni Kuya Morris samtang iya kong gitulisok. “Nagpakauwaw ka lang sa atong bansagon.”

Wala ko magtingog. Kutob lang ko sa paghilak.

Sa laing higayon, si Kuya Harvey na usab ang nasugamak sa away. Ako gihapon maoy hinungdan. Nakugang na lang ang akong mga ginikanan dihang may nagpahibalo nila nga nabalhog sa Iriga City Jail si Kuya Harvey.

Dihang ilang gisusi, nasayran nila nga may gikaaway diay ang akong maguwang. Usa ka lalaki nga nakatilaw sab nako. Naglagot kuno si Kuya Harvey kay nanugilon kuno ang maong lalaki dihang nahubog kini nga wild kuno ko kaayo sa kama. Tungod sa kaulaw ni Kuya Harvey, iyang gipahamtangan ang maong lalaki sa iyang kasuko.

Lupig ni Kuya Harvey ang maong lalaki sa taksanay sa kusog maong nabun-og kini pag-ayo. Ang problema kay mikiha ang maong lalaki batok sa akong igsuon hinungdan nga gidakop sa mga polis ang akong igsuon. Napugos sila si Papa Augusto sa pagbutang og piyansa alang sa hinanali ug temporaryong kagawasan sa akong maguwang.

“Nag-among-among ka lang sa imong mga igsuon, Editha,’ gitulisok ko ni Papa. “Kun dili ka gyud moundang nianang imong bisyo, tingalig duna gyu’y usa kanamo nga makapatay kun maputos na mi sa kauwaw.’

Pero wala ko madutli sa gipamulong ni Papa. Mihari gihapon sa akong galamhan ang kahigal. Migahom kanako ang kahakog sa unodnong kalipay. Mao nga nagpadayon ko sa pagpaulipon sa akong biga. -- Sumpayan pa