'Wawaw'

Si Insi Sarya usa ka tawo nga "wawaw." Sa walay duhaduha, daghan ang mangutana kun unsa ang kahulogan sa pulong "wawaw." Ang tubag niini: walay edukasyon o illiterate sa Iningles pa. Sa laktod, "no read, no write."

Wala intawon makaeskuyla si Insi Sarya kay lagi ang iyang mga ginikanan ug katigulangan pulos pod nga "wawaw."

Apan luyo niining tanan, si Insi Sarya aduna diay panglantaw alang sa kaugmaon sa bugtong niyang anak nga si Maria. Biyuda na si Insi Sarya, busa gidoble niya ang iyang pagpaningkamot aron mabuhi. Labaw sa tanan, mahatagan gayod niya si Maria sa edukasyon.

Dili gusto si Insi Sarya nga ang iyang anak maparehas niya nga "wawaw." Makanunayon ang pag-ampo sa tigulang. Sa grasya sa Diyos, sa kapolihay, naangkon gyud ni Insi Sarya ang kalamposan.

Sa laing bahin, si Maria nakahimamat usab og usa ka tawo nga buotan ug propesyonal usab.

Nunot sa ligid sa panahon, si Maria nahimong magtutudlo sa usa ka unibersidad. Samtang ang iyang nabana usa ka enhinyero.

Dili matukib ang kalipay ni Insi Sarya nga sa kataposan, nabawi ra ang iyang pagka "wawaw..." (Kataposan)