Ayaw'g usiki ang kinabuhi

Kalit lang nikulismaot ang nawong ni Owen sa diha nga iyang nasayran gikan sa iyang paryente nga duha sa suod niyang mga higala nga si Edgar ug Kito nitaliwan na diay sa laing kinabuhi.

Si Edgar nga nagpangedaron lang og 45 namatay gumikan sa atake sa kasingkasing. Samtang si Kito nga 50 anyos pa lang namatay gumikan sa urom. Unya kalit lang naumol ang pipila ka lusok sa luha nga naglumba sa pag panaligdig gikan sa iyang mga mata.

Klaro ug tataw kaayo nga iyang gikaguol ang sayo nga kamatayon sa duha niya ka mga higala. Kay nahimo na man kining tipik sa iyang kinabuhi.

Lab-as pa sa handurawan ni Owen ang malipayong gutlo sa ilang pagsuroysuroy sa Olango, Aloguinsan aron sa pagpamisita sa mga dalaga nga ilang naibgan.

Ang panahon nga sila magdungan sa pagkanta. Sa dihang nikanta si Owen og mga love songs. Samtang si Edgar nga maayong laki sa sista mao ang moduyog.

Lab-as pa usab sa handurawan ni Owen nga mokalit lang siya og bohakhak og katawa gumikan sa komedya ni Kito nga hilabihang siawa.

Ang panahon diin   magpulihanay sila og kanta samtang nagdimdim sa tam-is niyang tuba ni Noy Edion.

Ang malipayon adlaw sa ilang panag-uban daw kagahapon lang. Apan karon wala na sila. Natugkad karon ni Owen nga mubo ra gayod kaayo ang kinabuhi sa tawo nga dili maayong usikan lamang. (Kataposan)