Sukli sa utang

 (Gula 85)

Hingpit kong nagpaulipon sa unodnong kahuyang gumikan sa kahidlaw sa lawasnong kalipay nga dili mabangbang. Morag mabuang man god ko kun dili matambalan ang akong kauhaw sa kalalim sa panaghilawas.

Sanglit dili man lagi ko satisfied sa performance ni Woodrow, nagpatira ko sa lainlaing mga lalaki sa among dapit. Bisan kinsa na lang nga mga lalaki ang akong gikalambigit. Relasyon nga dili tinukmod sa gugma. Sexual pleasure ray among giapas.

Hangtod nga miabot ang panahon nga ang inalisngaw sa salawayon kong binuhatan nabaniog sa among dapit. Tungod sa akong pagpaulipon sa naghingapin nga biga, gitawag ko sa katawhan sa among lugar nga maniac.

Ang maong tabi-tabi wala kapugnging miabot sa mga dalunggan sa akong mga ginikanan. Naulaw sila pagkasayod sa akong binuhatan maong ila dayon kong gisukmatan mahitungod niini.

“Naunsa ka man, Editha.” Gahi kaayo ang tingog ni Papa Augusto. “Diin ka man moliwat nga kuragan ka man kaayo nga wala man untay burikat sa atong pamilya? Nagpakauwaw ka man lang!

“Nagpalahi ka man, Editha,” dason ni Mama Clemencia. “Sa pamilya sa imong Papa, wakay bigaon nga sama nimo. Sa ako sab nga pamilya, labaw nang walay kundatan. Ngano man intawon nga naingon ka man niini?”

“Dili man tinuod nang mga tabi-tabi nga inyong nadungog, ba,” giingnan ko sila. “Tumo-tumo ra na sa mga tawong balhiboon og dila.”

“Nag-una mi nimo sa duyan, Editha,” nagkanayon si Papa. “Kun dunay aso, duna gyuy kayo.”

“Baniog na kaayo dinhi sa ato ang balita nga si bisan kinsa lang kunong lalaki ang motakubang nimo,” gikan ni Mama. “Nagpakauwaw ka man lang sa atong bansagon.”

“Hunonga na kanang imong binuang, Editha,” nagpaminti samtang namulong si Papa. “Kay kun dili, tingalig mapatay ko unya ikaw.”

Apan imbes isilsil sa akong alimpatakan, gipalapos nako sa pikas kong dalunggan ang mga pulong ni Papa Augusto.

Ug nagpadayon ko sa akong bisyo. Mora’g tinuod tingali ang giingon sa mga tawo nga usa na ako ka maniac. Dili ko matagbaw sa usa lang ka lalaki. Bisan kinsa lang nga lalaki ang nakatilaw sa akong pagka babaye. Hangtod nga lakip ang akong tulo ka magulang nga mga lalaki mibati na sab og kaulaw sa akong binuhatan. – Sumpayan pa